نۇر-سۇلتاندا ەكولوگيانى جاقسارتۋ ءۇشىن قانداي شارالار اتقارىلىپ جاتىر؟

بۇل جايىندا قالا باسشىسى التاي كولگىنوۆ مالىمەت تاراتتى.

«قوقىس وڭدەۋ كەشەنىنىڭ اۋماعىنا كۇنىنە 1 مىڭ تونناعا دەيىن قوقىس، قالدىقتار شىعارىلادى. سول جەردە سۇرىپتالىپ، قايتا وڭدەلەدى. مەملەكەت باسشىسى ەكولوگيا ماسەلەلەرىنە، اتاپ ايتقاندا زاڭنامالىق بازانى قامتاماسىز ەتۋ مەن «waste to energy» تەحنولوگياسىن ەنگىزۋ ءۇشىن قولايلى ينۆەستيتسيالىق جاعداي جاساۋعا ەرەكشە كوڭىل ءبولىپ وتىر» دەپ جازادى اكىم Instagram پاراقشاسىندا.

ونىڭ ايتۋىنشا، ەكولوگيا جاعدايىنىڭ ناشارلاۋىنا جول بەرمەي، رۇقسات ەتىلمەگەن قوقىس ورىندارىن كوبەيتپەس ءۇشىن ەكولوگيا مينيسترلىگىمەن بىرگە ءبىرقاتار شارالار قابىلدانعان.

«ءبىرىنشى. قوقىس وڭدەۋ زاۋىتىن قايتا جاڭارتىپ جاتىرمىز. جاڭارعان كاسىپورىن قۋاتىن جىلىنا ەكى ەسە، ياعني 250 مىڭ توننادان 450 مىڭ تونناعا دەيىن ارتتىرادى. قالدىقتار جارتىلاي اۆتوماتتى تۇردە سۇرىپتالماق.

ەكىنشى. پوليگون ەكى ۇياشىقتان تۇرسا، ونىڭ بىرەۋى ابدەن تولىپ قالعان. سالاعا جاۋاپتى ورگاندارمەن بىرلەسىپ پوليگونعا رەكۋلتيۆاتسيا جۇرگىزەمىز.

ءۇشىنشى. بىلتىر «سيەۆەرنايا گريادا» كەنىشىنە رەكۋلتيۆاتسيا جۇرگىزە وتىرىپ، قۇرىلىس قالدىقتارىن قويماعا جيناپ، قايتا وڭدەيتىن الاڭ قۇرىلىسىن باستادىق. بۇل ەكولوگيا مەن سانيتاريا- ەپيدەميولوگيا جاعدايىن ايتارلىقتاي جاقسارتادى. الاڭدا كىرپىش، اسفالت، بەتون قالدىقتارى جانە باسقا قۇرىلىس قالدىقتارىن قايتا وڭدەيتىن ۇساتۋ كەشەنىن ورناتۋ قاراستىرىلعان. سونىمەن بىرگە، مىسالى، قۇرىلىس قالدىقتارىنىڭ %50 قيىرشىق تاسقا، %10-15 ارماتۋراعا وڭدەۋگە بولادى.

ءتورتىنشى. قاتتى تۇرمىستىق قالدىقتاردى بولەك جيناۋ جۇمىسىن جالعاستىرا بەرەمىز. ول ءۇشىن قالادا كونتەينەرلەر ورناتىلدى. ت ق ق وڭدەۋ دەڭگەيى - %75، قايتالاما شيكىزاتتى الۋ - %17 كورسەتكىشىنە جەتتى.

بۇل كورسەتكىشتەردى جوسپارلى تۇردە ارتتىرۋ قاجەت. قۇرامىندا سىنابى بار شامداردى جيناۋ ءۇشىن قالا بويىنشا 530 دان استام ارنايى كونتەينەر ورناتىلدى. بۇگىنگى تاڭدا 500 مىڭنان استام شام جينالىپ، كادەگە جاراتىلدى. پاندەميا باستالعالى بەرى ادام كوپ جينالاتىن جەرلەردە مەديتسينالىق زاتتاردى، ماسكالاردى، قولعاپتاردى جانە باسقالاردى تاستايتىن ارنايى كونتەينەرلەر ورناتىلدى.

بەسىنشى. رۇقسات ەتىلمەگەن قوقىس ۇيىندىلەرىن جويۋ بويىنشا جۇمىس جۇرگىزىلىپ جاتىر. جىل باسىنان بەرى 300 گە جۋىق پوليگون جويىلدى» دەلىنگەن حابارلامادا.