كوروناۆيرۋس قاۋپى: بالالاردى قورعاۋ مەن شەتەلدىك ساپارلاردى قىسقارتۋعا ءمان بەرۋ كەرەك

قازىرگى كەزدە الەم ەلدەرىندە اۋرۋدىڭ تارالۋى جالعاسۋدا، وسى ورايدا ىندەتكە شالدىعۋ دەڭگەيى ارتىپ كەلەدى.

«سىرقاتتانۋدىڭ ءوسۋى بارلىق وڭىرلەردە بايقالىپ وتىر. وتكەن اپتامەن سالىستىرعاندا اۋرۋ 2,6 ەسەگە ءوستى. بۇگىنگى كۇنى 14 ءوڭىردىڭ - سولتۇستىك قازاقستان وبلىسىنىڭ، باتىس قازاقستان وبلىسىنىڭ، اقمولا، ماڭعىستاۋ، الماتى، اتىراۋ، پاۆلودار، قوستاناي، باتىس قازاقستان، شىعىس قازاقستان، قاراعاندى وبلىستارىنىڭ اكىمدەرى، نۇر-سۇلتان، الماتى، شىمكەنت قالالارىنىڭ اكىمدەرى كۇشەيتىلگەن شارالار قابىلدادى. كۇشەيتىلگەن شارالار قوعامدىق تاماقتانۋ وبەكتىلەرىنىڭ تولتىرىلۋىن ازايتۋعا، كاسىپكەرلىك نەمەسە وزگە دە قىزمەت وبەكتىلەرىنىڭ جانە حالىقتىڭ تىنىس-تىرشىلىگىنە قىزمەت ەتەتىن نىسانداردىڭ جۇمىس كەستەسىن قىسقارتۋعا، شەكتەۋ شارالارىن ساقتاۋعا، دەمالىس كۇندەرى قوعامدىق كولىك قوزعالىسىن توقتاتا تۇرۋعا باعىتتالعان»، - دەدى ق ر دەنساۋلىق ساقتاۋ ۆيتسە-ءمينيسترى اجار عينيات ورتالىق كوممۋنيكاتسيالار قىزمەتىندە.

وسى ورايدا ۆەدومستۆو وكىلى كوروناۆيرۋس ينفەكتسياسىنىڭ تارالۋى كەزەڭىندە بالالاردىڭ دەنساۋلىعىن ساقتاۋ باعىتىنا ەرەكشە توقتالدى.

ۆيتسە-ءمينيستردىڭ ايتۋىنشا، كۇن سايىن جاڭا تۋعان نارەستەلەر مەن كوروناۆيرۋستىق ينفەكتسياسى بار بالالار جاعدايىنا مونيتورينگ پەن باقىلاۋ جۇرگىزىلەدى. بيىل ەلىمىزدە COVID-19 دياگنوزى راستالعان بارلىعى 3164 بالا تىركەلگەن، ونىڭ ىشىندە 114 جاڭا تۋعان نارەستە بار. بۇل تۇرعىدا بارلىق جاعدايلار پ ت ر ناتيجەلەرىمەن راستالعان.

بەلگىلى بولعانداي، COVID-19 دياگنوزى زەرتحانالىق راستالماعان ك ۆ ي 1810 بالادا تىركەلگەن. بالالاردا COVID-19 ينفەكتسياسىنان ءولىم-ءجىتىم بولعان جوق.

«كوروناۆيرۋستىق ينفەكتسيانىڭ اعىمى 85 پايىز (2697) بالالاردا سيمپتومسىز جانە جەڭىل بولدى، 14,2 پايىزىندا (448) ورتاشا دارەجەدە جانە 19 بالادا اۋىر بولدى. بۇل بارلىق جاعدايلاردىڭ 0,6 پايىزىن قۇرادى، بارلىعى ستاتسيونارلىق جاعدايدا ەمدەلدى»، - دەدى ا. عينيات.

قازىرگى كەزدە COVID-19 ىندەتى بار 340 بالا باقىلاۋدا تۇر، ونىڭ ىشىندە جاڭا تۋعان 3 نارەستە، 18 جاسقا دەيىنگى بالالار-337، ەمدەۋگە جاتقىزىلعاندار - 55، امبۋلاتوريالىق ەمدەۋدە - 285.

ايتا كەتەيىك، COVID-19 ىندەتى بار 200 وقۋشى، سونداي-اق بالاباقشانىڭ كەزەكشى توبىنا بارعان 18 بالا جانە ينتەرناتتان 21 بالا باقىلاۋ شارالارىمەن قامتىلدى.

«2020-جىلعى تامىزدان باستاپ رەسپۋبليكادا COVID- 19 ىندەتىمەن استاسقان مۋلتيجۇيەلىك قابىنۋ سيندرومى (كاۆاساكيگە ۇقساس سيندروم) جاعدايلارى تىركەلە باستادى. اۋرۋ ۋشىققان جاز ايلارىنان كەيىن بالالار اراسىندا اتالعان ىندەت انىقتالدى. ءۇش اپتادان بەرى بالالار اراسىندا بۇل اۋرۋ تىركەلمەدى»، - دەدى ۆيتسە-مينيستر.

بيىل مۋلتيجۇيەلىك قابىنۋ سيندرومى بار 42 بالا تىركەلگەن، قازىرگى ۋاقىتتا مۇنداي دياگنوزى بار پاتسيەنتتەر جوق. ايتپاقشى، اجار عينيات كوروناۆيرۋستى قايتا جۇقتىرۋ دەرەگى قاراعاندى وبلىسىندا تىركەلگەنىن ايتتى.

ال باتىس قازاقستان وبلىسىنداعى جاعداي راستالمادى، ياعني وسى وڭىردەگى ايەل ادامنىڭ ىندەتكە شالدىعۋى قايتا جۇقتىرۋ دەرەگى رەتىندە قاراستىرىلماي وتىر. ك ۆ ي بويىنشا تەستىلەۋ ارتتى.

بۇگىنگە دەيىن قازاقستاندا كوروناۆيرۋس ينفەكتسياسىنا قاتىستى 3 ميلليون 655 تەستىلەۋ جۇرگىزىلدى.

ەستەرىڭىزدە بولسا، شىلدە ايىندا قازاقستاندا تەستىلەۋ دەڭگەيى تاۋلىگىنە 40 مىڭنان ءسال استام بولاتىن. قازىرگى كەزدە بۇل كورسەتكىش تاۋلىگىنە 70 مىڭعا جەتكىزىلدى. جۇرگىزىلگەن تەستىلەۋ كولەمى ەپيدەميولوگيالىق جاعدايدى ەسكەرە وتىرىپ ارتىپ كەلەدى.

ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆانىڭ سوزىنە قاراعاندا، وتكەن اپتادا ەل بويىنشا تەستىلەۋ سانىنىڭ 10 پايىزعا وسكەنى بايقالدى. ال كەيبىر وڭىرلەردە بۇل كورسەتكىش ەسەلەپ ارتتى.

«سولتۇستىك قازاقستان وبلىسىندا تەستىلەۋ ءۇش ەسەگە، شىعىس قازاقستان وبلىسىندا ەكى ەسەگە، الماتى وبلىسىندا 2,4 ەسەگە، اقمولا وبلىسىندا 1,6 ەسەگە ءوستى. سونىمەن قاتار، قالعان وڭىرلەردە دە تەستىلەۋ دەڭگەيى ارتىپ كەلەدى»، - دەدى كوميتەت باسشىسى.

ا. ەسماعامبەتوۆا كوروناۆيرۋس ينفەكتسياسى قايتادان جۇقتىرىپ الۋ قاتەرىن ەسكەرە وتىرىپ، ەل حالقىن ساقتىق شارالارىن ورىنداۋعا شاقىردى.

«وسى ورايدا الەم ەلدەرىندە ىندەتتى قايتا جۇقتىرۋ وقيعالارى تىركەلىپ جاتقانىن ءتۇسىنۋ كەرەك. بۇل ءوز كەزەگىندە اۋرۋدى ەڭسەرگەننەن كەيىنگى يممۋنيتەت ۇزاق ەمەس، قىسقا مەرزىمدى ەكەنى تاعى دا راستالىپ وتىر. حالىقارالىق زەرتتەۋلەرگە سايكەس، اۋرۋدان ەمدەلگەننەن كەيىنگى يممۋنيتەت 1 دەن 3 ايعا دەيىن ساقتالادى. ىندەتتى قايتا جۇقتىرۋ مۇمكىندىگى بار ەكەنىن بىلەمىز. اۋرۋدان ەمدەلگەن ادامدار بارلىق الدىن الۋ شارالارىن ساقتاۋ كەرەكتىگىن ەستە ساقتاعانى دۇرىس»، - دەدى ول.

سونىمەن قاتار كوميتەت باسشىسى قازاقستان ازاماتتارىنا شەتەلگە بارماۋعا كەڭەس بەردى. سەبەبى وزگە مەملەكەتتەن ساپارلاپ كەلگەندەر اراسىندا ىندەت جۇقتىرۋ جاعدايلارى ارتىپ كەلەدى.

«سوندىقتان شەتەلگە ساپارلاۋدى جوسپارلاساڭىزدار، ول ەلدە كوروناۆيرۋس ينفەكتسياسىن جۇقتىرۋ قاۋپى بار ەكەنىن ەسكەرىڭىزدەر. قازىرگى كەزدە مۇمكىندىگىنشە شەتەلگە شىقپاۋعا تىرىسۋ كەرەك»، - دەدى ا. ەسماعامبەتوۆا.