پاۆلوداردا پوليتسەي جولاۋشىنى ورتەنىپ جاتقان كولىكتەن امان الىپ شىقتى

بارلىق جولاۋشىلار سىرتقا جۇگىرىپ شىقتى، تەك بىرەۋىنىڭ اياعى قىسىلىپ، شىعا الماي قالدى، دەپ حابارلايدى قازاقپارات. «ءۇشىنشى قاراشا كۇنى ساعات 17:30 شاماسىندا پاۆلودار- ەكىباستۇز كۇرە جولىنىڭ ونىنشى شاقىرىمىندا، لەنينسكي كەنتىنىڭ ماڭىندا «Toyota-Emina» كولىگىن جۇرگىزىپ كەلە جاتقان 30 جاستاعى ايەل اينالىپ ءوتۋ كەزىندە «اۋدي س-100» ماركالى كولىكپەن سوقتىعىسقان. جول-كولىك وقيعاسى سالدارىنان ەكىنشى كولىك ورتەنە باستادى»، - دەپ حابارلادى تىلشىلەرگە پاۆلودار وبلىستىق پوليتسيا دەپارتامەنتىنىڭ باسپا ءسوز قىزمەتىنەن. وقيعا ورنىنا پاۆلودار- لەنينسكي باعدارى بويىنشا پاترۋلدىك قىزمەت جۇرگىزگەن اعا لەيتەنانت ازات قايىربەكوۆ پەن ەربول ايعوجين كەلىپ جەتتى.

«اعا لەيتەنانت ازات قايىربەكوۆ وقيعا تۋرالى دەرەۋ حابارلاپ، ءورت ءسوندىرۋ قىزمەتى مەن جەدەل جاردەمدى شاقىرتتى. پوليتسيا قىزمەتكەرى ەربول ايعوجين كولىككە قاراي جۇگىردى، ونداعى بارلىق جولاۋشىلار وزدەرى شىعىپ ۇلگەردى، اراسىندا ءبىر جاس ەر ادام عانا اياعى وتىراتىن ورىن مەن پانەلدىڭ اراسىنا قىسىلىپ، شىعا الماي تۇردى»، - دەپ قوسىپ ءوتتى باسپا ءسوز قىزمەتىنەن. جالىن كولىكتىڭ سالونىنا تاراي باستادى. گازبەن جۇرەتىن كولىك كەز كەلگەن ساتتە جارىلۋى مۇمكىن ەدى. اعا لەيتەنانت ايعوجين جولاۋشىنىڭ اياعىن بوساتىپ، جولدىڭ جيەگىنە جەتۋگە كومەكتەستى. بىرنەشە مينۋتتان سوڭ كولىك تولىق ورتەنىپ كەتتى.

«پوليتسەيلەر قاۋىپسىزدىكتى ساقتاۋ ماقساتىندا ادامداردى جولدىڭ جيەگىنە شىعارىپ، شوشىنىپ قالعانداردى تىنىشتاندىردى. وقيعا ورنىنا كەلىپ جەتكەن ءورت ءسوندىرۋ كولىگى ءورتتى ءسوندىردى»، - دەپ قوستى باسپا ءسوز قىزمەتىنەن.

توتەنشە جاعداي سالدارىنان جاراقات العان «اۋدي س-100» كولىگىنىڭ ەكى جولاۋشىسى اۋرۋحاناعا جەتكىزىلدى. كولىك ايىپ تۇراعىنا قويىلدى، تەكسەرىس جۇرگىزىلىپ جاتىر.

اۆتور: زارينا تۋعانبايەۆا