ەلوردالىق كومپانيا اقىلى كولىك تۇراقتارى ءۇشىن تولەمدەردى زاڭسىز جيناعان – اكىمدىك
«زاڭدى نەگىزى جوق كاسىپورىن (نۇرجول بۋلۆارىن قوسپاعاندا) قالانىڭ جول جەلىسى بويىنا پاركوماتتار، جول بەلگىلەرى مەن اقپاراتتىق تاقتالار ورناتقان. جابدىقتى دەمونتاجداۋ قاجەتتىلىگى تۋرالى «پاركوۆوچنوە پروسترانستۆو» ج ش س- نا بىرنەشە رەت ەسكەرتىلگەنىمەن ءوتىنىش ەلەنبەدى. سونىمەن قاتار تەكسەرۋ كەزىندە كوميسسيا قوعامدىق كولىك تۇراقتارى ءۇشىن تولەمدەردىڭ زاڭسىز جينالعانىن انىقتادى»، - دەلىنگەن اكىمدىكتىڭ Facebook-تەگى رەسمي پاراقشاسىندا جاريالانعان اقپاراتتا.
وسىعان بايلانىستى نۇر- سۇلتان قالاسى اكىمدىگىنىڭ كولىك جانە جول- كولىك ينفراقۇرىلىمىن دامىتۋ باسقارماسى اۆتوكولىك يەلەرى شىعىندارىن وتەۋ ماقساتىندا مەملەكەتتىك كىرىستەر دەپارتامەنتىنە حات جولداعان. ەسكە سالا كەتەيىك، كوشەلەر مەن داڭعىلداردى كەپتەلىستەن ارىلتۋعا ارنالعان ىلكى جوبا 2018 -جىلدىڭ 15-قاڭتارىندا نۇرجول بۋلۆارىنىڭ اۋماعىندا باستالدى. جوبا جەكە سەرىكتەستىك قارجىسىنا جۇزەگە اسىرىلدى.
بولاشاقتا پاركوماتتاردىڭ سانىن كەڭەيتۋ جوسپارلانعان. الايدا «پاركوۆوچنوە پروسترانستۆو» ج ش س تاراپىنان بىرنەشە رەت زاڭبۇزۋشىلىق ورىن الۋىنا جانە تۇرعىنداردىڭ شاعىمدارىنا بايلانىستى ەلوردا اكىمدىگى جوبانىڭ كەڭەيۋىن توقتاتا تۇرۋ شەشىمىن قابىلدادى. كەلىسىمشارتتى بۇزۋ تۋرالى سوتقا ارىز بەرىلدى.
