دەنساۋلىق ساقتاۋ نىساندارى ەرەكشە باقىلاۋعا الىندى - توتەنشە جاعدايلار ءمينيسترى

بۇل تۋرالى ق ر توتەنشە جاعدايلار ءمينيسترى يۋري يلين ايتتى، دەپ حابارلايدى قازاقپارات ءتىلشىسى.

«جىلىتۋ ماۋسىمىنا دايىندىقتى ەسەپكە الا وتىرىپ، 417 جىلۋ ەنەرگياسىمەن قامتاماسىز ەتۋ جانە 4 322 ءبىلىم بەرۋ نىساندارىنا تەكسەرۋ جۇرگىزىلدى. ونىڭ ىشىندە 47 جىلۋ ەلەكتر ورتالىعى جانە 565 وقۋ ورنى ەرەجە بۇزۋ جاعدايىندا پايدالانىلۋدا»، - دەدى مينيستر ۇكىمەت وتىرىسىندا.

وسى ورايدا ول ءتيىستى اقپارات ۋاكىلەتتى ورگاندار مەن اكىمدىكتەرگە جولدانعانىن جەتكىزدى.

«پاندەمياعا بايلانىستى دەنساۋلىق ساقتاۋ نىساندارى ەرەكشە باقىلاۋعا الىندى، 1409 نىسان ەسەپتە تۇر. قاراشا ايىنىڭ سوڭىنا دەيىن تەكسەرۋ شارالارى بويىنشا اقپارات ۇكىمەتكە ۇسىنىلادى»، - دەدى يۋري يلين.

بۇدان بۇرىن حابارلانعانداي، ۇكىمەت وتىرىسىندا پرەمەر-مينيستر اسقار مامين ءبىر اي ىشىندە بارلىق وڭىردە گاز-تەحنيكالىق ينسپەكتسيانى قۇرۋدى تاپسىردى.