تەراكت: بىرنەشە ادام قازا تاپتى، پوليتسيا ارنايى وپەراتسيا جۇرگىزىپ جاتىر

قارۋلى شابۋىلدى بىرنەشە قاسكوي ۇيىمداستىرعان، ولاردىڭ ءبىرىن پوليتسيا اتىپ ءولتىردى، ەندى سىبايلاستارىن ىزدەپ جاتىر. قالادا اۋقىمدى ارنايى وپەراتسيا جۇرگىزىلىپ جاتىر، دەپ حابارلايدى قازاقپارات euronews كە سىلتەمە جاساپ.

پوليتسيانىڭ مالىمەتىنشە، شابۋىل التى ورىندا، سونىڭ ىشىندە قالا ورتالىعىنداعى سيناگوگا جانىندا، ەۆرەي ورتالىعى مەن مەيرامحانا جانىندا بولعان. قۇقىق قورعاۋ ورگاندارى ءبىر ادامنىڭ قايتىس بولعانىن، بىرنەشە ادامنىڭ اۋىر جاراقات العانىن، ونىڭ ىشىندە پوليتسيا قىزمەتكەرى بار ەكەنىن راستادى.

قالا بيلىگىنىڭ مالىمەتىنشە، تەراكتىدەن 15 ادام زارداپ شەككەن. سونىمەن قاتار جەدەل جاردەم قىزمەتى بىرنەشە ادامنىڭ قازا تاپقانى تۋرالى حابارلادى. بيلىك قالا تۇرعىندارىنان ۇيدەن شىقپاۋدى، تەرەزەگە جاقىنداماۋدى سۇرايدى جانە كۋاگەرلەرگە وقيعا ورنىنان ۆيدەو مەن سۋرەتتى الەۋمەتتىك جەلىگە تاراتپاۋعا شاقىردى. قالادا قوعامدىق كولىك توقتاتىلدى.

راۆۆين شلومو حوفمەيستەر جۋرناليستەرگە شابۋىل كەزىندە سيناگوگا جابىق بولعانىن ايتتى. ول بارعا كەلۋشىلەرگە وق اتقان كەم دەگەندە ءبىر ادامدى كورگەن. 3- قاراشادان باستاپ اۋستريا كوروناۆيرۋسقا بايلانىستى كارانتين ەنگىزدى.

اتاپ ايتقاندا كەشكە بارلار مەن مەيرامحانالار ادامعا تولىپ كەتەتىندىكتەن، 20:00 دەن 06:00 گە دەيىن ۇيدەن شىعۋ شەكتەلدى. اۋستريا كانتسلەرى سەباستيان كۋرتس پوليتسيا شابۋىل جاساۋشىلارعا قارسى باتىل ارەكەت ەتەتىنىن ايتتى.

«ءبىز تەرروريزممەن قورقىتىپ-ۇركىتۋگە جول بەرمەيمىز جانە مۇنداي شابۋىلدارعا قارسى بار كۇش-جىگەرىمىزبەن كۇرەسەمىز»، - دەلىنگەن كانتسلەردىڭ مالىمدەمەسىندە.