كوكشەتاۋ قالاسىنا كىرەبەرىس جولدارعا سانيتارلىق پوستار قويىلادى

ايماق باسشىسىنىڭ ايتۋىنشا، دەرتپەن كۇرەسۋ ءۇشىن كوكشەتاۋ قالاسىنا كىرەبەرىس جولدارعا امالسىزدان سانيتارلىق پوستار قويىلادى، دەپ حابارلايدى قازاقپارات ءتىلشىسى.

«وكىنىشكە قاراي، كوكشەتاۋ قالاسىندا سوڭعى اپتادا سىرقاتتانعانداردىڭ سانى ەكى ەسە ءوستى. سول سەبەپتى، ءبىز مۇقيات بولىپ، ماسكا رەجيمىن، الەۋمەتتىك قاشىقتىقتى ساقتاۋىمىز كەرەك. بارلىعى وزىمىزگە بايلانىستى»، - دەپ اتاپ ءوتتى ايماق باسشىسى ە. مارجىقپايەۆ.

وتكەن جۇما كۇنى اقمولا وبلىسىنا جۇمىس ساپارىمەن كەلگەن مەملەكەت باسشىسىنا جاڭا جۇقپالى اۋرۋلار اۋرۋحاناسى تانىستىرىلدى.

اتالمىش مەديتسينالىق مەكەمە وسى اپتادا جۇمىسىن باستايدى. كوروناۆيرۋس ينفەكتسياسىنىڭ ەكىنشى تولقىنىنا دايىندىقتى ءسوز ەتكەن ايماق باسشىسى وكپەنى جەلدەتۋ اپاراتىنىڭ جەتكىلىكتى كولەمدە ساتىپ الىنعاندىعىنا توقتالدى. ناۋرىز-قاراشا ايلارى ارالىعىندا بارلىعى 325 اپپارات ساتىپ الىندى. سونىمەن بىرگە، رەنگەنت اپپاراتى جانە جىلجىمالى كەشەن ساتىپ الىنۋدا.

«ءبىز ءدارى-دارمەكتىڭ ەكى ايلىق قورىن جاسادىق. دارىلەر مەديتسينالىق مەكەمەلەر مەن ءدارىحانالاردا دا جەتكىلىكتى. ءبىراق تا، وزىمىزگە ءوزىمىز جانىمىز اشىماساق، بىزگە ەشتەمە كومەكتەسپەيدى»، - دەپ تولىقتىرا كەلە، ە. مارجىقپايەۆ اقمولالىقتاردى ماسكا رەجيمىن ساقتاۋعا، سونداي-اق، مەيراماحانالار مەن تويعا بارماۋعا شاقىردى.

«وكىنىشكە وراي، ساندار كوڭىل كونشىتپەيدى. قازان ايىندا 256 ادام اۋىرسا، ونىڭ 65 پايىزى وبلىس ورتالىعىنىڭ ۇلەسىندە. سول سەبەپتى، بۇگىننەن باستاپ، مەملەكەتتىك باس سانيتارلىق دارىگەر كارانتيندىك شارالاردى كۇشەيتۋ تۋرالى قاۋلىعا قول قويادى. وسىعان وراي، قالا سىرتىندا سانيتارلىق بلوكپوستار قويىلادى. بۇل امالسىزدان بارىپ وتىرعان شارا، بۇدان ءبىز قۇتىلا المايمىز. ساۋدا ورىندارى، مەيرامحانالار جانە وقۋ ورىندارىنىڭ جۇمىسىن قايتا قاراپ جاتىرىمىز»، - دەدى ە. مارجىقپايەۆ.

ايماق باسشىسى تۇرعىنداردىڭ ساقتىق شارالارىنا سالعىرت قاراپ وتىرعاندىعىنا الاڭداۋشىلىق ءبىلدىردى.

مىسال رەتىندە، سەمىزباي كەنشىندەگى 500 جۇمىسشىنىڭ 46 سى كوروناۆيرۋسكە شالدىعۋىنا بايلانىستى، تۇتاس كاسىپورىندى جابۋعا تۋرا كەلگەندىگىن ايتتى.