بىرنەشە ادامنىڭ اتىنان ونلاين- نەسيە العان قوستانايلىق ۇستالدى

وبلىستىق پوليتسيا دەپارتامەنتىنىڭ مالىمەتىنشە، جەدەل وپەراتسيا اقپاراتتىق تەحنولوگيالار، اۆتورلىق قۇقىقتاردى قورعاۋ سالاسىنداعى قىلمىستارمەن كۇرەستىڭ تيىمدىلىگىن ارتتىرۋعا باعىتتالعان. ەكى كۇننىڭ ىشىندە كريمينالدىق پوليتسيا قىزمەتكەرلەرى 13 ينتەرنەت- الاياقتى انىقتادى. ماسەلەن، قوستاناي قالاسىندا پوليتسەيلەر بەس فاكتى بويىنشا ينتەرنەت- الاياقتىق جاسادى دەگەن كۇدىكپەن 26 جاستاعى جەرگىلىكتى تۇرعىندى ۇستادى.

«قاسكۇنەم وبلىس ورتالىعىنىڭ تۇرعىندارىنا شاعىن نەسيە ۇيىمدارىنىڭ بىرىنەن ونلاين نەسيە راسىمدەگەن. ءوتىنىش بەرۋشىلەرگە كەلتىرىلگەن جالپى شىعىن ميلليون تەڭگەدەن استى. كۇدىكتى زارداپ شەككەندەردىڭ بىرىنە 900 مىڭ تەڭگەگە جۋىق سوماعا نەسيە راسىمدەگەن» ، دەلىنگەن ۆەدومستۆو حابارلاماسىندا.

تاعى ءبىرى ونلاين ساۋدا جاساۋ جولىمەن پايدا تاپقىسى كەلگەن. ءتارتىپ ساقشىلارى وسى دەرەك بويىنشا قوستاناي قالاسىنىڭ 25 جاستاعى تۇرعىنىن قولعا ءتۇسىردى.

«كوروناۆيرۋس پاندەمياسى كەزىندە قورعانىس قۇرالدارىن ساتۋ ارقىلى زاڭسىز اقشا تاپپاق بولىپ، سايتتاردىڭ بىرىندە رەزەڭكە قولعاپتار تۋرالى حابارلاندىرۋ ورنالاستىرعان. وعان ەلدىڭ ءار وبلىسىنان قوڭىراۋلار تۇسكەن. مىسالى، الماتى وبلىسىنىڭ تۇرعىنى كۇدىكتىگە 36 مىڭ رەزەڭكە قولعاپقا تاپسىرىس بەرىپ، ءبىر جارىم ميلليون تەڭگەدەن استام اقشا جىبەرگەن. تاۋار ءوتىنىش بەرۋشىگە كەلمەگەن. الاياق س ق و مەن اقمولا وبلىستارىنىڭ تۇرعىندارىنان 1 ميلليون 30 مىڭ تەڭگە اقشا العان» ، - دەيدى پوليتسيانىڭ باسپا ءسوز قىزمەتى مامانى كەنجە قونىسباي.

قازىر بارلىق دەرەكتەر بويىنشا سوتقا دەيىنگى تەرگەۋ امالدارى جۇرگىزىلۋدە.