سولتۇستىك قازاقستاندا ءبىر ءۇيىر جىلقى ەكى جول اپاتىنا سەبەپشى بولدى

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ەكى وقيعا دا ەسىل اۋدانىنىڭ اۋماعىندا تۇندە بولعان. 1- قاراشا كۇنى شال اقىن اۋدانىنىڭ 54 جاستاعى تۇرعىنى «لادا لارگۋس» اۆتوكولىگىمەن جۇبايى جانە تۋىسىمەن پەتروپاۆل قالاسىنان ۇيىنە قايتىپ كەلە جاتادى. ساعات 22.00 شاماسىندا ەسىل اۋدانى بىرلىك اۋىلى ماڭىنداعى جەزقازعان- پەتروپاۆل تاس جولىندا اۆتوكولىك الدىنا ءبىر ءۇيىر جىلقى شىعا كەلگەن. جۇرگىزۋشىنىڭ ايتۋىنشا، سوقتىعىسپاۋ مۇمكىن بولمادى. ادامدار ءدىن امان، سوققى العان جانۋار ءولىپ قالدى. اۆتوكولىككە زاقىم كەلگەنىمەن، ساپارىن جالعاستىردى. پوليتسەيلەر باقتاشىسىز جۇرگەن جىلقىنى ىزدەۋگە كىرىسكەن كەزدە، جاقىن ماڭدا ەكىنشى جول- كولىك وقيعاسى بولدى.

32 جاستاعى پەتروپاۆلدىق سول جولدىڭ بويىندا «لادا پريورا» اۆتوكولىگىمەن ع. مۇسىرەپوۆ اۋدانىنىڭ نوۆويشيمسكوە اۋىلىنا قاراي كەلە جاتىپ، الدىنان شىعا كەلگەن جىلقىنى جانامالاي سوعىپ كەتكەن. جۇرگىزۋشى مەن 29 جاستاعى جولاۋشى زارداپ شەككەن جوق، ال جانۋار قاشىپ كەتتى. كولىككە مەحانيكالىق زاقىم كەلدى. ءتارتىپ ساقشىلارى بوس جۇرگەن مالدىڭ يەلەرىن تاپتى. جىلقى يەلەرى ق ر اكىمشىلىك قۇقىق بۇزۋشىلىق تۋرالى كودەكستىڭ «اۋىل شارۋاشىلىعى جانۋارلارىن جايۋ قاعيدالارىن، يتتەر مەن مىسىقتاردى اسىراۋ جانە سەرۋەندەتۋ قاعيدالارىن، قاڭعىباس يتتەر مەن مىسىقتاردى اۋلاۋ جانە جويۋ قاعيدالارىن بۇزۋ» بابى بويىنشا جاۋاپكەرشىلىككە تارتىلادى.

«جىل باسىنان وسىمەن ءتورتىنشى رەت قاڭعىباس مالدار جول- كولىك وقيعاسىنا سەبەپشى بولدى. مال يەلەرىنىڭ جاۋاپسىزدىعىنان ادامدار جاراقات الىپ، ءتىپتى ادام ولىمىنە اكەلىپ سوعۋى دا مۇمكىن. اۋداندىق پوليتسيا ءبولىمىنىڭ قىزمەتكەرلەرى مالدىڭ بوس جۇرۋىنە جول بەرمەۋ ءۇشىن تۇسىندىرمە ءىس- شارالارىن جۇرگىزىپ تۇرادى. تامىز ايىنىڭ ورتاسىنان، س ق و اۋماعىندا مال باعۋ قاعيداسى قولدانىسقا ەنگىزىلگەن ساتتەن، مالدارىن ەركىن جايىلىمعا جىبەرگەن اۋىلدىڭ 40 تۇرعىنى جاۋاپكەرشىلىككە تارتىلدى»، - دەيدى ەسىل اۋدانىنىڭ پ ب باستىعى ەرلىك ەسلامبەكوۆ.

ايتا كەتسەك، وبلىستا جىل باسىنان اۆتوكولىكتەر مەن جانۋارلاردىڭ سوقتىعىسۋىنان ەكى ادام جاراقات الدى.

اۆتور: اقەركە داۋرەنبەك قىزى