يزميردەگى ءزىلزالا: قازاقستاندىق جۋرناليست تۇركيا حالقى اپات سالدارىمەن قالاي كۇرەسىپ جاتقانىن ايتىپ بەردى
نۇر- سۇلتان. قازاقپارات - قازاقستاندىق تاۋەلسىز جۋرناليست اسەل قايروللا تۇركيا حالقى ءزىلزالانىڭ سالدارىمەن قالاي كۇرەسىپ جاتقانىن ايتىپ بەردى. ول جەر سىلكىنىسى بولعان كۇنى يزمير قالاسىندا قاتتى زارداپ شەككەن ەكى اۋداننىڭ ءبىرى - بورنوۆاداعى ۇيىندە بولىپتى.
قازاقپارات ءتىلشىسى الەۋمەتتىك جەلى ارقىلى اسەم قايروللامەن حابارلاسىپ، تۇرىك اعايىندار مەن سول جاقتاعى وتانداستاردىڭ جاعدايىن ءبىلىپ كورگەن ەدى.
«تۇركيا ۇكىمەتى جانىنداعى توتەنشە جاعدايدىڭ الدىن الۋ جانە جويۋ باسقارماسىنىڭ 2- قاراشا كۇنى ساعات 11.29-دا بەرگەن مالىمەتى بويىنشا، ءزىلزالادان قايتىس بولعاندار سانى 83-كە، جارالىلار سانى 962-گە جەتتى. قازىر قيراعان 6 عيماراتتا قۇتقارۋ جۇمىستارى جۇرگىزىلىپ جاتىر. جارالىلاردىڭ 743- ءى جەڭىل جاراقاتپەن قۇتىلسا، 219-ى اۋرۋحاناعا جاتقىزىلعان، ونىڭ 9-ى جانساقتاۋ بولىمىندە، 4-ەۋى وتە اۋىر حالدە»، - دەيدى اسەم قايروللا.
جۋرناليستتىڭ ايتۋىنشا جالپى يزمير عانا ەمەس، تۇركيانىڭ بارلىق ءوڭىرى سەيسمولوگيالىق اپاتتى ايماققا جاتادى. بىلتىر ەلدىڭ شىعىس جاعىندا دا ۇلكەن جەر سىلكىنىسى بولعان. ال بيىل يزميردە عانا ەمەس، ىستانبۇل، ۋشاك، ايدىن دەگەن ايماقتاردا دا ءزىلزالا تىركەلگەن. الايدا ەپيتسەنتر يزميردە بولعاندىقتان جەر سىلكىنىسىنىڭ ەڭ قاتتى زاردابىمەن وسى قالانىڭ تۇرعىندارى بەتپە- بەت كەلگەن.
«افتەرشوكتار ءالى دە بولىپ جاتىر. يزميردە وسى ۇلكەن ءزىلزالادان بەرى 1143 رەت تەربەلىس انىقتالعان. ەڭ ۇلكەنى - 5 بالعا جەتكەن. ماعان وسى جاقتا وقىپ جاتقان ستۋدەنتتەردىڭ تۋىستارى، جالپى كوپ كىسىلەر حابارلاسىپ، ۋايىمداپ جاتىر. قازاقستاننىڭ تۇركياداعى ەلشىلىگى جاقسى كومەكتەسىپ جاتقانىن ايتا كەتۋ كەرەك. بىردەن بارىمىزگە حابارلاسىپ، يزميردەگى قازاقستاننىڭ ازاماتتارى مەن ستۋدەنتتەرىن تۇگەندەپ، شۇعىل ارەكەتكە كوشتى. زارداپ شەككەن ەشكىم جوق. تەك قازاقستاندىق ستۋدەنتتەر تۇراتىن جەكەمەنشىك جاتاقحانانىڭ ءبىر قابىرعاسى جارىلعان ەكەن. ءبىزدىڭ ىستانبۇلداعى كونسۋلدىق باسقا جاتاقحانامەن سويلەسىپ ستۋدەنتتەرىمىزدى سول جاققا ورنالاستىردى. قاتتى قاۋىپ جوق»، - دەگەن اسەر قايروللا ينتەرنەتتە تاراپ كەتكەن سۋ باسىپ جاتقان جەرلەر مەن قۇلاپ جاتقان ۇيلەردىڭ فوتوسۋرەتتەرىنە قاتىستى پىكىرىن ءبىلدىردى.
ءزىلزالا يزميردەگى ەكى اۋداندا تىركەلگەن. بورنوۆو دەگەن اۋداندا 2-اق عيمارات قۇلاسا، بايراكلى دەگەن اۋدانداعى ەسكى عيماراتتاردىڭ كوبى قۇلاپتى. «جالپى بايراكلى - يزميردەگى پروبلەمالىق اۋدان. كەزىندە ول اۋداندا رۇقساتسىز ۇيلەر وتە كوپ سالىنعان. كەيىن ونداعى بيلىك سول ۇيلەردى ءسۇرۋ تۋرالى شەشىم قابىلداعان كەزدە سونداعى ازاماتتار كوپ شاعىمدانىپ شىققاننان كەيىن ۇيلەر سول بەتىندە قالىپتى. ال قالانىڭ باس جوسپارىندا ول جاقتاردى جاڭارتۋ جۇمىستارى بار- تىن. يزمير، ايدىن ولكەلەرىندە قازان- قاراشا ايلارىندا جەر سىلكىنىسى ءجيى تىركەلەدى. ءبىراق ەڭ جويقىنى - وسى جولى بولىپ تۇر. جالپى تۇركيادا جۇرگەنىمە 2 جىلداي بولىپ قالدى. بۇرىن ءزىلزالا ارى كەتسە 5 سەكۋندتقا عانا سوزىلاتىنداي كورىنەتىن. وزىمە وسى جولى 1-1,30 مينۋتتاي تەربەلىپ تۇرعانداي سەزىلدى. ءبىراق ماماندار 45 سەكۋند تەربەلگەنىن جاريا ەتتى»، - دەيدى وتانداسىمىز.
جۋرناليست سونىمەن قاتار تۇركياداعى بيلىك ءزىلزالانىڭ سالدارىمەن قالاي كۇرەسىپ جاتقانىن ايتىپ ءوتتى. «ءبىزدىڭ ەلدە اپات تىركەلسە جاۋاپتى مينيسترلىكتەر نەمەسە پرەزيدەنت وسىنداي قاراجات بولىنەدى دەپ ايتادى دا، سول قاراجاتتىڭ بولىنەتىنى بەلگىلى. ال تۇركيادا اپات جاعدايىندا ءار مينيسترلىك، ءار وبلىس ءوز بەتىمەن بيۋدجەتتەن قاراجات بولۋگە قۇقىلى. سوندىقتان ءار مينيسترلىك شامالارى كەلگەنشە كومەك كورسەتۋدە. مىسالى وتكەن جۇمادا تۇركيانىڭ وتباسى جانە الەۋمەتتىك قىزمەت كورسەتۋ مينيسترلىگى 5 ميلليون ليرا بولسە، بۇگىن تاعى 5 ميلليون ليرا جىبەرەمىز دەپ وتىر. سونىمەن قاتار مەملەكەتتىك بيۋدجەتتەن ۇيىنەن ايىرىلعان ءار وتباسىعا قاۋىپسىز ايماقتان ءۇي جالداۋ ءۇشىن، جاعدايلارى تۇزەلگەنشە 5 مىڭ ليرا اۋدارىلادى. سودان كەيىن ەشقانداي زاتتارىن الا الىپ شىعىپ ۇلگەرمەگەندەرگە ءبىر رەتتىك تارتىپتە 30 مىڭ ليرا بەرىلەدى»، - دەيدى ول.
يزمير قالاسىندا قازىرگى ۋاقىتتا باسپاناسىز قالعان وتباسىلاردى ۋاقىتشا پانالاتۋ ءۇشىن اشىق الاڭداردا 3545 شاتىر قۇرىلعان. ولارعا 24382 كورپە، 13280 توسەك، 5500 توسەك- ورىن، جاپقىش، 2657 اس ۇيگە قاجەتتى جابدىقتار جانە تۇراقتى اس- اۋقات جىبەرىلىپ تۇرادى. شاتىرلار قۇرىلعان جەرلەردىڭ ماڭايىنا دارەتحانالار مەن سۋعا تۇسەتىن ورىندار دا ورناتىلىپ جاتىر.
«جەر سىلكىنىسىنەن 65 ساعاتتان سوڭ - جاڭا عانا ءبىر ءۇيدىڭ استىنان 3 جاسار قىز قۇتقارىلىپتى. جارالى ەكەن. حابار تاراعان جارتى ساعاتتىڭ ىشىندە ىستانبۇل توتەنشە جاعداي بويىنشا قۇتقارۋ وتريادىن جىبەردى. ادانا الىس بولسا دا ولاردىڭ دا قۇتقارۋشىلارى جىلدام جەتتى. جالپى تۇرىكتەردىڭ ۇيىمشىلدىعىن ەرەكشە اتاپ وتكىم كەلەدى»، - دەپ ءتۇيدى اسەل قايروللا.
فوتوسۋرەتتەر sabah.com.tr سايتىنان الىندى
اۆتور: ايان بەكەن ۇلى
