كريشتيانۋ رونالدۋ كارانتيننەن شىققان بويدا قوس گولدىڭ اۆتورى اتاندى
يتاليا چەمپيوناتىنىڭ التىنشى تۋرىندا اتاقتى فۋتبولشى، قازىر باپكەر اندرەا پيرلونىڭ شاكىرتتەرى سىرت الاڭدا «سپەتسيا» كومانداسىمەن كەزدەستى.
«يۋۆەنتۋس» وتكەن ماۋسىمدا كەزەكتى چەمپيوندىق اتاققا قول جەتكىزسە، «سپەتسيا» بىرىنشىلىككە بيىل قوسىلعان ەدى. ك. رونالدۋدان كوروناۆيرۋس انىقتالىپ، كارانتينگە كەتكەننەن كەيىن تۋريندىك كلۋب ەل چەمپيوناتىندا تاعى ءبىر دەبيۋتانت «كروتونەمەن»، سوسىن ءوز الاڭىندا «ۆەرونامەن» 1:1 ەسەبىمەن تەڭ ويناپ، التىنشى ورىنعا سىرعىپ كەتكەن ەدى.
ونىڭ ۇستىنە چەمپيوندار ليگاسىندا ءوز الاڭىندا «بارسەلوناعا» 0:2 ەسەبىمەن ەسە جىبەردى.
«سپەتسيامەن» ويىن دا «يۋۆەنتۋسقا» وڭايعا تۇسكەن جوق. ءبىرىنشى تايمدا الۆارو موراتا ەسەپ اشقانمەن، الاڭ يەلەرىنەن توممازو پوبەگا 11 مەترلىكتەن تارازى باسىن تەڭەستىرىپ ۇلگەردى.
ەكىنشى تايمدا دا ەسەپ ءبىرازعا دەيىن وزگەرگەن جوق. مىنە، وسى كەزدە ا. پيرلو 58-مينۋتتا ارگەنتينالىق پاۋلو دەبالانىڭ ورنىنا ك. رونالدۋدى ويىنعا قوستى. ارادا ءبىر مينۋت وتپەي جاتىپ، ا. موراتادان كەرەمەت پاس العان ك. رونالدۋ قاقپاشىنى دا وپ-وڭاي الداپ ءوتىپ، گول سوقتى.
سودان كەيىن تاعى ءبىر تىڭنان قوسىلعان ويىنشى ادريەن رابو شەبەرلىگىمەن تانىلدى - 3:1. ال 77-مينۋتتا ك. رونالدۋ 11 مەترلىك ايىپ دوبىن ءدال ورىنداپ، ەسەپتى 4:1-گە جەتكىزدى.
وسىلايشا 12 ۇپاي جيناعان «يۋۆەنتۋس» تۋرنير كەستەسىندە ەكىنشى ورىنعا كوتەرىلدى.
بيىلعى چەمپيوناتتى تاماشا باستاعان «ميلان» كلۋبى 16 ۇپايمەن جەكەدارا كوش باستاپ كەلەدى.
6-تۋردا ستەفانو پيوليدىڭ شاكىرتتەرى سىرت الاڭدا «ۋدينەزەنى» 2:1 ەسەبىمەن تىزە بۇكتىردى.
بۇل ماتچتا 39 جاستاعى شۆەتسيالىق زلاتان يبراگيموۆيچ جەڭىس گولىن سوعىپ، ءوزىنىڭ ءالى دە بابىندا ەكەندىگىن تانىتا ءبىلدى. چەمپيوندار ليگاسىندا G توبىندا 3 ۇپايمەن ەكىنشى ورىندا كەلە جاتقان «يۋۆەنتۋس» 4- قاراشا كۇنى سىرت الاڭدا ماجارستاندىق «فەرەنتسۆاروش» كلۋبىمەن كەزدەسەدى.
ماجارستاندىق كوماندانىڭ قۇرامىندا كەزىندە «قايراتتا» ونەر كورسەتكەن برازيليالىق يساەل وينايدى.
ەسكە سالا كەتەيىك، بۇدان بۇرىن ك. رونالدۋدىڭ كوروناۆيرۋس جۇقتىرعانىن جازعان بولاتىنبىز.
