قىزىلوردادا جوعالعان اڭشىعا قاتىستى وقيعانىڭ ءجاي- جاپسارى انىقتالدى
ەسكە سالساق، قۇس اتۋعا شىققان ءۇش جىگىتتىڭ بىرەۋى ارال اۋماعىنداعى ەلسىز دالادا جوعالىپ كەتكەن بولاتىن. اڭشىنىڭ تۋعان- تۋىستارى مەن جولداستارى ونى ءوز بەتىنشە ىزدەۋگە تىرىسقان. ارال اۋداندىق پوليتسيا بولىمىنە بۇل جونىندە حابار كەلىپ تۇسكەننەن كەيىن ماماندار قۇتقارۋشىلارمەن بىرلەسىپ، دەرەۋ ىزدەستىرۋ جۇمىستارىنا كىرىسەدى. بۇگىن تاڭەرتەڭ اقتوبە وبلىسىندا تۇراتىن جىگىت ەلسىز دالادا امان- ەسەن تابىلدى.
«ىزدەۋ جۇمىستارى اڭشىلاردىڭ بارعان كىشى ارال تەڭىزىنىڭ «كوكارال» پلوتيناسىنان باستالدى. وعان «كرونا» قىزمەتتىك ءيتى، قاجەتتى تەحنيكا جۇمىلدىرىلدى. سول ايماق درون ارقىلى زەرتتەلدى. جوعالعان ازاماتتىڭ سۋرەتى بارلىق پوليتسيا بەكەتىنە جىبەرىلدى. ىزدەۋ جۇمىستارىنىڭ ناتيجەسىندە بۇگىن ساعات 09.30 شاماسىندا جوعالعان اڭشى امان- ەسەن تابىلدى. ول ەلدى مەكەننەن شالعاي كەتىپ، باعىت- باعدارىنان اداسقانىن ايتادى. ول تۋىستارىمەن امان- ەسەن تابىستى. دەنساۋلىعىنا ەشقانداي قاۋىپ ءتونىپ تۇرعان جوق. پوليتسەيلەر ورىن العان وقيعاعا بايلانىستى تەكسەرۋ جۇمىستارىن جۇرگىزىپ، وقيعانىڭ ءمان- جايىن انىقتاۋدا»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنىڭ باسپا ءسوز قىزمەتىنەن.
وبلىستىق توتەنشە جاعدايلار دەپارتامەنتى ءورت ءسوندىرۋ جانە اۆاريالىق- قۇتقارۋ جۇمىستارى قىزمەتىنىڭ باستىعى نۇرسۇلتان يبراگيموۆتىڭ ايتۋىنشا، جوعالعان ازاماتتى جەرگىلىكتى اڭشىلار تاپقان.
«ىزدەستىرۋ- قۇتقارۋ جۇمىستارى «كوكارال» پلوتيناسىنان 30 شاقىرىم قاشىقتىقتا ۇيىمداستىرىلدى. وعان 8 پوليتسيا قىزمەتكەرى، اۋدان اكىمدىگىنىڭ 5 وكىلى جانە قىزىلوردا وبلىسىنىڭ ءورت ءسوندىرۋ قىزمەتى جەدەل- قۇتقارۋ جاساعىنان 4 قۇتقارۋشى جۇمىلدىرىلعان. ونى جەرگىلىكتى اڭشىلار تاۋىپ، قۇتقارۋشىلارعا حابار بەردى»، - دەدى ن. يبراگيموۆ.
اۆتور: ءادىلجان ۇمبەت