قازاقستاندا «مۋزىكا وينايتىن جول» پايدا بولدى
مۇنداي تەحنولوگيا قازاقستاندا العاش رەت قولدانىلىپ وتىرعانىن ايتىپ وتكەن ءجون، دەپ حابارلايدى قازاقپارات قر يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنە سىلتەمەمەن. «قازاۆتوجول» ۇ ك» ا ق جاساعان پيلوتتىق جوبا جول ءجۇرۋ قاۋىپسىزدىگى سالاسىنا جاڭا تەحنولوگيالاردى ەنگىزۋ اياسىندا ىسكە قوسىلعان. ونى جۇزەگە اسىرۋ بارىسىندا گەرمانيا، كورەيا، ا ق ش پەن جاپونيا ەلدەرىنىڭ تاجىريبەسى ەسكەرىلدى.
«مۋزىكالىق جولدار» جۇرگىزۋشىلەرگە توتەنشە قاۋىپتى ۋچاستكەلەردە جىلدامدىقتى ازايتۋعا كومەكتەسەدى. اۋەن اۆتوكولىكتىڭ دوڭگەلەكتەرى مەن سۋىق پلاستيكتەن جاسالعان شۋ بەلگىسى جاناسقاندا شىعادى. كولىك شۋ جولاعىنان 90 ك م/ساع جىلدامدىعىمەن جۇرگەن جاعدايدا، اۋەن دىبىستى وزگەرتەدى. وسىلايشا جۇرگىزۋشىنىڭ نازارىن اۋدارىپ، ءجۇرۋ جىلدامدىعىن ازايتۋعا اسەر ەتەدى.
ەكسپەريمەنتتىڭ ناتيجەسى بويىنشا «قازاۆتوجول» ۇ ك» ا ق كەلەر جىلى وزگە دە رەسپۋبليكالىق جولدارعا مۋزىكالىق جولاقتار ورناتپاق. شۋ جولاقتارى - بەدەرلى سىزىقتار تۇرىندەگى ارنايى جول بەلگىسى. مۇنداي جولاقتار جىلدامدىقتى اسىرۋ، شارشاۋ مەن رولدە ۇيىقتاپ قالۋ سەبەبىنەن بولاتىن جول- كولىك وقيعاسىن بولدىرماۋ ماقساتىندا سالىنادى. ولاردىڭ ۇستىمەن وتكەندە ءدىرىل پايدا بولىپ، جۇرگىزۋشىلەردىڭ جيناقتالۋىنا كومەكتەسەدى.
