سەناتور: يپوتەكالىق قارىز بەرەتىن ەكىنشى دەڭگەيلى بانكتەرگە باقىلاۋدى كۇشەيتۋ كەرەك

ۇكىمەت باسشىسىنا دەپۋتاتتىق ساۋال جولداعان دەپۋتاتتار بالاما نۇسقالار ۇسىنباي تۇرىپ ازاماتتاردى جالعىز تۇرعىن ۇيىنەن ماجبۇرلەپ شىعارۋعا جول بەرمەۋگە ۇكىمەتتىڭ نازارىن اۋدارۋعا تىرىستى. ناقتىراق ايتقاندا سەنات ءتوراعاسىنىڭ ورىنباسارى اسقار شاكىروۆ پەن دەپۋتات ءلاززات سۇلەيمەن وسى ماسەلەگە بايلانىستى ق ر پرەمەر- مينيسترىنە دەپۋتاتتىق ساۋال جولدادى.

«قازىر ءۇي الۋ كەزەگىندە شامامەن 530 مىڭعا جۋىق ادام تۇر. جىل سايىن ولاردىڭ سانى تاعى 50 مىڭ ادامعا كوبەيەدى. «نۇرلى جەر» باعدارلاماسىنا كىرەتىن «شاڭىراق» قاناتقاقتى جوباسى اكىمدىكتەردە تۇرعىن ءۇي الۋعا كەزەكتە تۇرعاندارعا يپوتەكالىق نەسيە بەرۋدى كوزدەيدى. نەسيە الۋ ءۇشىن وتباسىنىڭ ءار مۇشەسىنىڭ تابىسى ايىنا 3,1 ەسەلىك ەڭ تومەنگى كۇنكورىس دەڭگەيىنەن (32 668 تەڭگە) اسپاۋى ءتيىس. ول حالىقتىڭ تابىسى از ادامدارعا ارنالعانىن كورسەتەدى. زەينەتاقى قورىنان بەرىلەتىن سوڭعى التى ايدىڭ ءۇزىندى كوشىرمەسى - كىرىستەردى راستاۋ نىسانى»، - دەدى سەنات وتىرىسىندا دەپۋتاتتىق ساۋالدى وقىعان ءلاززات سۇلەيمەن.

ونىڭ ايتۋىنشا وسى جوبانى ىسكە اسىرۋ تاجىريبەسى كورسەتكەندەي، باسپانا وسال ساناتتاعى، ونىڭ ىشىندە مۇمكىندىكتەرى شەكتەۋلى ازاماتتار ءۇشىن قولجەتىمسىز بولىپ وتىر.

«ماسەلەن، 1 جانە Ⅱ توپتاعى مۇگەدەكتىگى بار ادامدار ولاردىڭ ەڭبەك تابىسىن راستاۋدىڭ بولماۋىنا بايلانىستى جەڭىلدەتىلگەن يپوتەكالىق كرەديت الا المايدى. بۇل ازاماتتاردىڭ ادەتتە رەسمي جۇمىسقا ورنالاسۋعا جانە تيىسىنشە زەينەتاقى قورىنا جارنا اۋدارۋعا مۇمكىندىگى جوق»، - دەدى ءلاززات سۇلەيمەن.

دەپۋتات سونداي- اق «7-20-25» باعدارلاماسى كەزەك پەن تىركەۋسىز، ءبىراق تابىستارى 3، 1 ەسەلىك ەڭ تومەنگى كۇنكورىس دەڭگەيىنەن جوعارى ازاماتتاردى تۇرعىن ۇيمەن قامتاماسىز ەتۋگە باعىتتالعانىن اتاپ ءوتتى. اتالعان باعدارلاما كوپتەگەن قازاقستاندىقتار ءۇشىن ەداۋىر قولجەتىمدى بولعانىمەن باستاپقى تۇرعىن ءۇي نارىعىندا عانا جۇمىس ىستەيدى.

«سونىمەن بىرگە پايدالانۋعا قولدانىسقا ەنگىزۋ ساتىندەگى تۇرعىن ءۇيدى تابۋ، ادەتتە وتە قيىن، سەبەبى باستاپقى تۇرعىن ءۇي نارىعى پاتەرلەردى كەيىننەن قايتا ساتۋ ءۇشىن بىرنەشە پاتەردى ءبىر ۋاقىتتا ساتىپ الاتىن الىپساتارلار قىزمەتىنىڭ نىسانى بولىپ وتىر. وسىعان بايلانىستى ازاماتتار الدىن الا برونداۋ شارتىمەن تۇرعىن ءۇي ساتىپ الۋعا جانە تۇرعىن ءۇي پايدالانۋعا بەرىلگەننەن كەيىن عانا اتالعان باعدارلاما بويىنشا يپوتەكالىق كرەديتتى رەسىمدەۋگە ءماجبۇر بولادى»، - دەدى سەنات دەپۋتاتى.

سەناتورلار ماجبۇرلەپ شىعارۋعا تىيىم سالۋ نەگىزدەرىنىڭ ءتىزىمى ساپالى تۇردە جان- جاقتى قايتا قارالۋى كەرەك ەكەنىن، سونداي- اق الدىن الۋ شارالارىن قابىلداۋ، اتاپ ايتقاندا ازاماتتاردىڭ يپوتەكالىق قارىزدى تولەۋ جونىندەگى تاۋەكەلدەرى مەن مۇمكىندىكتەرىنە مۇقيات تالداۋ جۇرگىزە وتىرىپ، ازاماتتارعا يپوتەكالىق قارىزدار بەرۋ كەزىندە ەكىنشى دەڭگەيلى بانكتەردىڭ باقىلاۋىن كۇشەيتۋ قاجەتتىگىن اتاپ كورسەتتى.

اۆتور: ايان بەكەن ۇلى