پەتروپاۆلدا ءبىر تۇندە ەكى كولىك ۇرلاعان جىگىت ۇستالدى

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ەكى قىلمىس تا پەتروپاۆلداعى بەرەكە ىقشام اۋدانىندا جاسالعان. تاڭەرتەڭ كولىگىن ورنىنان تاپپاعان تۇرعىندار بىردەن پوليتسياعا جۇگىنگەن. ءتارتىپ ساقشىلارى ءۇي-ءۇيدى ارالاپ، كورشىلەردەن جاۋاپ الدى، قىلمىس ورنىنان جاقىن جەردە ورنالاسقان باقىلاۋ كامەرالارىن تەكسەردى. بەينەجازبالاردان قىلمىستى ءبىر ادامنىڭ جاساعانى انىقتالدى. كولىك ۇرلاۋعا قاتىسى بولۋى مۇمكىن دەگەن كۇدىكپەن سول كۇنى پەتروپاۆلدىڭ 20 جاستاعى تۇرعىنى ۇستالدى.

ال اۆتوكولىكتەر بەرەكە اۋدانىنىڭ شەتىندەگى ورماننان تابىلىپ، يەلەرىنە قايتارىلدى.

«ۆاز 2106 جانە Opel Vectra كولىكتەرى قولدى بولعان. پوليتسيا كۇدىكتىنى ءىزىن سۋىتپاي انىقتاپ، ۇستادى. قازىرگى ۋاقىتتا ەكى فاكتى دە سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە «اۆتوموبيلدى نەمەسە وزگە دە كولىك قۇرالىن جىمقىرۋ ماقساتىنسىز قۇقىققا سىيىمسىز يەلەنىپ الۋ» بابى بويىنشا ەنگىزىلدى، تەرگەۋ جۇرگىزىلۋدە»، - دەيدى پەتروپاۆل قالالىق پوليتسيا باسقارماسى ەكىنشى پوليتسيا ءبولىمى باستىعىنىڭ ورىنباسارى سامات تاستان.

ۇستالعان جىگىت بۇرىن ۇقساس قىلمىس جاساعانى ءۇشىن سوتتالعان. سول ءتۇنى ماس بولعان. قازىرگى ۋاقىتتا پوليتسەيلەر كۇدىكتىنىڭ ۇقساس قىلمىستارعا قاتىسىن تەكسەرۋدە.

ايتا كەتەيىك، بەرەكە اۋدانىندا ايداپ اكەتىلگەن ەكى اۆتوكولىك تە قۇلىپتالماي تۇرعان، نە وتالدىرۋ قۇلپىندا كىلتى قالعان.

اۆتور: اقەركە داۋرەنبەك قىزى