قازاقستاندىق عالىمدار ءداندى- داقىلداردىڭ جاڭا سۇرپىن ازىرلەۋدە

بۇل تۋرالى اتالعان ورتالىقتىڭ ديرەكتورى مىندەتىن اتقارۋشى باقىت ەربولاتوۆ ءمالىم ەتتى، دەپ حابارلايدى قازاقپارات ءتىلشىسى.

«بىزدەگى بيدايدىڭ جاڭا سۇرىپتارى بۇزىلمايدى جانە ۇزاق ساقتالادى. سوندىقتان دا اۋىل شارۋاشىلىعى سالاسىندا كەڭىنەن تانىمال. بۇگىندە بيدايدىڭ «شورتاندى- 20/12»، «شورتاندى - 95 جاقسارتىلعان»، «استانا» اتتى جاڭا سۇرىپتارى ەلىمىز بويىنشا 3 ميلليوننان استام گا جەرگە ەگىلدى. جانە بۇل بيداي سۇرىپتارىنا سۇرانىس جوعارى. دەگەنمەن دە ءبىز بۇل جەتىستىكپەن توقتاماي، بيدايدىڭ باسقا سۇرىپتارىن ازىرلەۋدەمىز. اتاپ ايتقاندا، «اسىل ساپا»، «تايماس» اتاۋلى بيدايدىڭ جاڭا ءتۇرى بۇگىننىڭ وزىندە اۋىل شارۋاشىلىعىندا ۇلكەن سۇرانىسقا يە»، - دەدى ب. ەربولاتوۆ.

ونىڭ ايتۋىنشا، ورتالىق ماماندارى تەك بيداي عانا ەمەس، سونداي- اق مال ازىعى ءۇشىن ۇزاقمەرزىمدى شوپتەردىڭ دە جاڭا سۇرىپتارىن ازىرلەۋدى قولعا الۋدا.

«ايتار بولسام، سۋداندىق «نيكا» اتاۋلى ءشوپتى نوۆوسىبىرلىك عالىمدارمەن بىرلەسىپ ازىرلەدىك. بۇگىندە ول سىناق مەرزىمىنەن وتۋدە. ودان بولەك، جارمانىڭ دا جاڭا سۇرىپتارى بار. قازىرگى ۋاقىتتا ءبىزدىڭ ماماندار 140 تان استام اۋىل شارۋاشىلىعى ءداندى- داقىلدارىنىڭ جاڭا سۇرپىن دايىنداپ شىقتى. ونىڭ 60 پايىزىن بيداي تۇرلەرى قۇرايدى. بولاشاقتا ءوز ونىمدەرىمىزدى سىرتقا ەسپورتتاۋدى دا جوسپارلاۋدامىز. بۇگىندە بۇل باعىتتا رەسەيلىك ارىپتەستەرىمىزبەن بىرلەسكەن كولەمدى جۇمىستار اتقارىلۋدا»، - دەدى ول.

ايتا كەتسەك، بۇعان دەيىن اتالعان ورتالىقتىڭ نۇكتەلىك ەگىنشىلىك جوباسىن جۇزەگە اسىرىپ جاتقاندىعى تۋرالى حابارلاعان بولاتىنبىز.