ينتەرنەتتە بالالاردى ولىمگە يتەرمەلەيتىن توپتار انىقتالدى

بۇل تەك جىل باسىنان بەرگى ستاتيستيكا. ينتەرنەت ارقىلى ورىمدەي ۇل- قىزداردى ولىمگە يتەرەتىندەر باستاپقىدا ەشقانداي كۇدىك كەلتىرمەيدى.

بالالارعا تەك ويىن تۇرىندەگى تاپسىرمالار بەرەدى. ءبىراق اقىرى ولىمگە الىپ بارادى. مۇنى بىرەۋ بىلسە، بىرەۋ بىلمەيدى. وسىنداي ويىننان تالاي وتباسى زار يلەدى.

بۇل كاميللا. ءوزى ەمەس، سىنىپتاسى الەۋمەتتىك جەلىدەگى قارا نيەتتىلەردىڭ قۇرىعىنا ىلىنگەن. قۇربىسىنىڭ تۇزاققا تۇسكەنىن كاميللا بىردەن اڭعارماعان. ۋاقىت وتە كەلە وزىمەن بىرگە وقيتىن قىزدىڭ وزگەرگەنىن بايقايدى. تۇيىق، اشۋشاڭ بولا باستاپتى. سىنىپتاسىمەن ەبىن تاۋىپ سويلەسىپ، اقىرى ونىڭ قانداي جاعدايعا تاپ بولعانىن بىلەدى.

كاميللا، زارداپ شەككەن قىزدىڭ قۇربىسى:

- الەۋمەتتىك جەلىدە ءبىر توپقا كىرگەنىن ايتتى. باسىندا تەك ويىن دەپ قابىلداعان. قىزىقتى بولعان. العاشقىدا «سۋرەت سال، سۋرەتكە ءتۇس» دەگەن سىندى تاپسىرمالار بەرىپ وتىرعان. سوڭىندا ەندى «ءوز تامىرىڭدى كەس» دەگەن. ال الەۋمەتتىك جەلىدە وتىرعان كۋراتورلار «ەگەر تامىرىڭدى كەسپەسەڭ، ءبىز سەنىڭ اتا- اناڭدى ولتىرەمىز، مەكەن- جايلارىڭدى بىلەمىز» دەپ قورقىتقان. وسىدان سوڭ سىنىپتاسىم تامىرىن كەسكەنىن ايتتى. وسى جاعدايدىڭ ءبارىن قۇربىمنىڭ ءوزى بايانداپ بەرگەندە ەسەڭگىرەپ قالدىم.

بۇل سۇمدىقتى ءبىرىنشى بولىپ بىلگەن قوس قىزدىڭ سىنىپ جەتەكشىسى. كەيىن تەك كاميللانىڭ قۇربىسى ەمەس، وزگە دە سىنىپتاستارى وسى ويىندى ويناعاندارىن ايتقان. بالالارمەن پسيحولوگتار جۇمىس ىستەگەن. ايتەۋىر مۇنىڭ سوڭى تىنىش اياقتالعان. ارىستىقتار بۇل وقيعانى ۇمىتا باستاپ ەدى. ارادا ۋاقىت ءوتىپ، تاعى دا ارىستا الەۋمەتتىك جەلىدە جاسوسپىرىمدەردى ولىمگە يتەرمەلەيتىن ادامدار ۇستالدى.

الىبەك ورازالى، ق ر ءى ءى م كريمينالدى پوليتسيا دەپارتامەنتىنىڭ اعا جەدەل ۋاكىلى:

- تۇركىستان وبلىسى ارىس قالاسىنىڭ تۇرعىنى وسىنداي سۋيتسيدتىك ويىندارعا جەتەكشىلىك ەتكەنى ءۇشىن انىقتالىپ، ۇستالدى. ول ءوزى قۇرعان تەلەگرام كانالداردى پايدالانىپ، جاسوسپىرىمدەردى ولىمگە شاقىرعان. قازىر تەرگەۋ، تەكسەرۋ جاسالۋدا.

جەدەل ۋاكىل ايتادى. الەۋمەتتىك جەلىدەگى مۇنداي ارامپيعىلدى ادامداردى ۇستاۋ وڭاي ەمەس. اركەزدە بەلسەندى بولمايدى. جۇمىستارىن اراكىدىك جۇرگىزىپ تۇرادى. سوندىقتان گادجەتتىڭ ءداۋىرى ءجۇرىپ تۇرعاندا بالاعا اباي بولعان ءجون

. ەكاتەرينا ميرونوۆا، سۋيتسيدولوگ:

- ۇل- قىزدىڭ ءاربىر ارەكەتىنە ءجىتى ءمان بەرۋ كەرەك. بالا ءوزىن قالاي سەزىنىپ تۇر، نە ويلاپ ءجۇر، مىنە وسىنىڭ ءبارىن سۇراپ، سارالاپ وتىرۋ قاجەت.

بۇگىندە ىشكى ىستەر مينيسترلىگىندە عالامتور، الەۋمەتتىك جەلىگە ارنايى مونيتورينگ جۇرگىزىپ وتىراتىن تۇتاس دەپارتامەنت بار. ەگەر قانداي دا ءبىر كۇدىك تۋىنداسا الگى توپ ياكي پاراقشا بۇعاتتالادى. ءبىراق جاڭالارى دا پايدا بولىپ جاتادى. سوندىقتان ءار بالانى ۇيدەگى ەرەسەكتەر ءجىتى قاداعالاسا، دەيدى ماماندار.

www.24.kz