تەمىرتاۋدا ۇيىمداستىرىلعان كورمەگە كونە قۇران كىتابى قويىلدى
كورمەنىڭ باستى جادىگەرى - وتكەن عاسىردىڭ باسىندا جارىق كورگەن مۇسىلمانداردىڭ قاسيەتتى قۇران كىتابى، دەپ حابارلايدى قازاقپارات ءتىلشىسى.
مۇنداي سىيلىقتى مۇراجايعا 20 جىل بۇرىن مەشىتتىڭ نايب يمامى ءابدۋالي اسانوۆ تارتۋ ەتكەن بولاتىن. ونىڭ وتباسىندا بۇل كىتاپ قۇندى جادىگەر بولعان جانە اكەدەن بالاعا مۇرا رەتىندە قالىپ وتىرعان. قۇراننىڭ ەجەلگى كوشىرمەسى بۇگىنگى كۇنگە دەيىن تولىق كۇيىندە ساقتالماعان. بۇل تەك ورتاڭعى بولىگى. كىتاپتا اراب تىلىندەگى 60 تاراۋ بار.
«قۇران تەك اراب تىلىندە عانا قاسيەتتى سانالادى. جالپى بۇل كىتاپ الەمنىڭ 100 دەن استام تىلىنە اۋدارىلعان. كىتاپ 6200 اياتتان تۇرادى، ولار سۇرەگە جيناقتالعان. مۇندا 114 سۇرە بار، ولار ءوز كەزەگىندە مەككە جانە مەدينا سۇرەلەرى بولىپ بولىنەدى»، - دەيدى تاريحي- ولكەتانۋ مۇراجايىنىڭ ەكسكۋرسيا- بۇقارا ءبولىمىنىڭ مەڭگەرۋشىسى گۇلىم سىزدىقوۆا.
رۋحاني كەلىسىم كۇنىنە ارنالعان كورمە قازان ايىنىڭ سوڭىنا دەيىن جالعاسادى.
