پلاستيك قوقىستى ورتەگەندە قاتەرلى ىسىك قاۋپى تۋىندايدى - ەكولوگ

بۇل تۋرالى «Jasyl Arystan» جەكە قورىنىڭ ساراپشى- ەكولوگى مارينا دروبوت مالىمدەدى، دەپ حابارلايدى قازاقپارات ءتىلشىسى.

«جىل سايىن لاستانۋدىڭ تىكەلەي نەمەسە جاناما اسەرىنەن ميلليونداعان ادامدار مەن جانۋارلار قازا تابادى. دۇنيەجۇزىلىك دەنساۋلىق ساقتاۋ ۇيىمى ونكولوگيالىق اۋرۋلاردىڭ كوبەيۋىن ەكولوگيالىق لاستانۋمەن بايلانىستىرىپ وتىر. كۇندەلىكتى ومىردە قولدانىلاتىن پلاستيك ادامدارعا قاتەرلى ىسىك، يممۋنيتەتتىڭ تومەندەۋىنە جانە گەنەتيكالىق مۋتاتسيالارعا شالدىعۋ قاتەرىن ءتوندىرىپ وتىر. سوندىقتان قازىر ونداعان ەلدەردە پلاستيكتى تۇتىنۋعا قاتىستى شەكتەۋلەر بىرتىندەپ ەنگىزىلىپ جاتىر. فرانتسيادا ءبىر رەتتىك پلاستيك ىدىستى قولدانۋعا تىيىم سالىنعان. كەلەسى جىلى ا ق ش، ۇلىبريتانيا، كانادا كوسمەتولوگيالىق ونىمدەگى ميكروپلاستيكتەرگە تىيىم سالادى. ال كەنيادا پلاستيك ءۇشىن ايىپپۇلدان بولەك، اباقتىعا قاماۋ جازاسى دا قاراستىرىلعان»، - دەدى ەكولوگ ورتالىق كوممۋنيكاتسيالار قىزمەتىندە وتكەن بريفينگتە. اسىرەسە مامان قازاقستاندا اۋىلدىق ەلدىمەكەندەردە پلاستيكتەردىڭ ءجيى ورتەلەتىنىن ەسكە سالدى.

«اۋىلداردا پلاستيكالىق بوتەلكەلەردەن باستاپ، سۋسابىن، كىر جۋعىش ۇنتاق قاپتامالارى سياقتى قالدىقتاردى ورتەيتىن ادەت بار. بۇل احۋالدى ودان ءارى قيىنداتادى. كادىمگى پوليەتيلەن پاكەت جانعان كەزدە اۋاعا 70 گە جۋىق كانتسەروگەندىك زاتتار بولىنەدى. اۋاعا تاراعان زياندى زاتتار ادام اعزاسىنا تۇسەدى جانە كەرى شىعارىلمايدى. وسىلايشا، ونكولوگيالىق اۋرۋ قاۋپى تۋىندايدى. ماسەلەن، قازاقستاندا 2019 -جىلدىڭ سوڭىنا قاراي قاتەرلى ىسىكپەن اۋىراتىن 180 مىڭ ادام تىركەلدى. ال تىركەلمەگەندەرى قانشاما؟ سونىمەن قاتار جىل سايىن 35 مىڭعا جۋىق جاڭا جاعدايلار تىركەلەدى. بۇل وتە قورقىنىشتى سيفرلار»، - دەيدى م. دروبوت.

ءاربىر قازاقستاندىق جىلىنا 400-450 كەلى نەمەسە كۇنىنە 1,5 كەلى قوقىس شىعارادى. قالدىقتاردىڭ تەك %3 عانا سۇرىپتالادى جانە قايتا وڭدەلەدى.

«بۇل - وتە تومەن كورسەتكىش جانە تۇرعىنداردىڭ قوقىستى سۇرىپتاۋدان گورى، لاقتىرا سالۋى وڭاي ەكەنىن كورسەتەدى. مۇنداي اۋقىممەن ءبىز جاقىن ارادا وتە كۇردەلى ەكولوگيالىق داعدارىسقا تاپ بولامىز. سوندىقتان ادامداردى كوبىرەك اقپاراتتاندىرىپ، ەكولوگيالىق اعارتۋشىلىق ارقىلى قورشاعان ورتاعا ۇقىپتى قاراۋعا تاربيەلەۋ وتە ماڭىزدى»، - دەدى ول.

ايتا كەتەيىك، قازاقستاندا وڭىرلەردىڭ پلاستيكپەن لاستانۋىن زەرتتەيتىن «Jasyl Arystan» جوباسى تانىستىرىلدى. قور وكىلدەرىنىڭ ايتۋىنشا، ءاربىر قازاقستاندىق جىلىنا 42 كەلى پلاستيك قوقىس شىعارادى.