ەلوردادا «اقىلدى» شلاگباۋمدار پايدا بولادى
نۇر-سۇلتان. قازاقپارات - ەلوردادا شلاگباۋمدار اۆتوماتتاندىرىلا باستادى. بۇل تۋرالى نۇر-سۇلتان قالاسىنىڭ سيفرلاندىرۋ جانە مەملەكەتتىك قىزمەت باسقارماسىنىڭ باسشىسى بوتاگوز قاسابەك ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ باسقارما پيلوتتىق جوبا رەتىندە شلاگباۋمدارعا «اقىلدى» قۇرىلعىلاردى ورناتا باستادى. بۇل رەتتە ءبىز شلاگباۋمنىڭ ءوزىن اۋىستىرعالى جاتقان جوقپىز. تەك شلاگباۋمنىڭ وزىنە قۇرىلعى بەكىتەمىز. شلاگباۋمنىڭ ۇستىنە ورناتىلعان كامەرا ساناۋلى سەكۋندتىڭ ىشىندە - جەدەل جاردەم، ءورت ءسوندىرۋ نەمەسە توتەنشە جاعداي قىزمەتىنىڭ كولىكتەرىن تانيتىن بولادى»، - دەدى بوتاگوز قاسابەك ونلاين بريفينگ بارىسىندا.
باسقارما باسشىسىنىڭ ايتۋىنا قاراعاندا، كولىكتىڭ ءنومىرىن وقىعاننان كەيىن قۇرىلعى اۆتوماتتى تۇردە سيگنال بەرىپ، شلاگباۋم وزدىگىنەن اشىلادى.
«ياعني بۇل ينتەللەكتۋالدى جۇيە. شلاگباۋمنىڭ ءوزىن اۋىستىرمايتىنىمىزدى تاعى دا ەسكەرتە كەتەيىن»، - دەدى بوتاگوز قاسابەك.
اۆتور: ايان بەكەن ۇلى
