قازاقستاندا كارانتين جەلتوقساندا ەنگىزىلۋى مۇمكىن - مينيستر ءۇش سەناريدى جاريالادى
نۇر- سۇلتان. قازاقپارات - ق ر دەنساۋلىق ساقتاۋ ءمينيسترى الەكسەي سوي كوروناۆيرۋس ىندەتىنىڭ جاڭا تولقىنى ەلىمىزدە ءۇش سەناري بويىنشا ءوربۋى مۇمكىن ەكەندىگىن ايتتى، دەپ حابارلايدى قازاقپارات ءتىلشىسى.
«بولجامعا سايكەس، قازاقستانداعى ەپيدەميا ءۇش سەناري بويىنشا دامۋى مۇمكىن. ول كۇندەلىكتى تۇزەتىلىپ وتىرادى. اتاپ ايتقاندا، پەسسيميستىك سەناريگە سايكەس، ماسكا رەجيمى تەك 60 پايىز قامتاماسىز ەتىلگەندە 2020 -جىلدىڭ قازان- جەلتوقسانىندا تىركەلگەن جاعدايلار سانى شامامەن 190 مىڭ ادامدى قۇراپ، 65 مىڭ ادام اۋرۋحاناعا جاتقىزۋدى قاجەت ەتەتىن بولادى. لوكداۋن ەنگىزۋ جەلتوقسان ايىنىڭ ورتاسىنا بولجانادى»، - دەدى مينيستر اقوردادا مەملەكەت باسشىسى قاسىم- جومارت توقايەۆتىڭ توراعالىعىمەن وتكەن كەڭەستە.
ونىڭ اتاپ وتۋىنشە، ەكىنشى شىنايى سەناري بويىنشا الەۋمەتتىك اراقاشىقتىق شارالارى قامتاماسىز ەتىلىپ، ماسكا رەجيمى 70 پايىزعا ورىندالعان جاعدايدا 2020 -جىلدىڭ قازان- جەلتوقسانىندا تىركەلگەن جاعدايلار سانى شامامەن 90 مىڭ ادامدى قۇرايدى. ال اۋرۋحاناعا جاتقىزۋدى قاجەت ەتەتىن ناۋقاستار سانى 30 مىڭ ادام بولادى. مۇنداي جاعدايدا لوكداۋن 2021 -جىلدىڭ قاڭتارىندا ەنگىزىلۋى مۇمكىن.
«اراقاشىقتىق ەرەجەسى ساقتالىپ، ماسكا رەجيمى 100 پايىز قامتاماسىز ەتىلگەن جاعدايدا بىزگە ەڭ جوعارى توسەك- ورىن قورى دەڭگەيىنىڭ 70 پايىزىنا جەتكەن كەزدەگى ءىس- ارەكەت قولدانىلاتىن قاتاڭ كارانتينگە جۇگىنۋ قاجەت بولمايدى. وسى وپتيميستىك ستسەناريي كەزىندە، 2020 -جىلدىڭ قازان- جەلتوقسانىندا تىركەلگەن جاعدايلار سانى شامامەن 40 مىڭ ادامدى قۇراپ، 15 مىڭ ادام اۋرۋحاناعا جاتقىزۋدى قاجەت ەتەدى» ، - دەدى الەكسەي سوي.
