ماڭعىستاۋدا بالالارىن بۇرىنعى كۇيەۋىنەن الا الماي جۇرگەن ايەل سۇحبات بەردى

تاعدىرى الەۋمەتتىك جەلىدە تالقىعا ءتۇسىپ، قوعامدا رەزونانس تۋدىرعان ايەل ماسەلەنىڭ ءمان جايىن ايتىپ، ماڭعىستاۋ ارناسىنا سۇقبات بەردى، دەپ حابارلايدى قازاقپارات ءتىلشىسى.

سوت شەشىمىمەن بالالارىن الۋعا كەلگەن اناعا ۇلكەن ۇلى قارسىلىق تانىتقان. ۆيدەودان كەيىن كوپشىلىك بالانىڭ اناسىن كىنالاپ، ماسەلەگە ءتيىستى ورگانداردىڭ ارالاسۋىن تالاپ ەتكەن. دەگەنمەن، بۇرىنعى كۇيەۋىمەن 13 جىل وتاسقان جانار حامزيەۆانىڭ ايتۋىنشا، سوت شەشىم شىعارار كەزدە ونىڭ الەۋمەتتىك- تۇرمىستىق جاعدايىن ەسكەرگەن. ەرلى- زايىپتىلاردىڭ ورتاق نەكەسىنەن 4 بالا بار. ۇشەۋى اكەسىنىڭ تاربيەسىندە، ال كەنجەسى اناسىندا.

«قازىر اتىراۋ وبلىسىندا 8 بولمەلى ۇيدە اتا- اناممەن بىرگە تۇرامىن. ءبىر مەكەمەدە ەدەن جۋىپ، ساۋدا- ساتتىقپەن اينالىسامىن. ءوز كۇنىمدى كورىپ، بالالارىمدى ءوز قامقورلىعىما الۋ ءۇشىن ۋاقىتپەن ساناسپاي جۇمىس ىستەۋگە ءماجبۇرمىن. ال، بالالاردىڭ اكەسى ورىنباسار وتەشبايەۆ دوسىنىڭ بەرگەن ءبىر بولمەلى قۋىقتاي ءۇيىن پانالاپ، تاكسي قىزمەتىن اتقارادى. ياعني، ول جۇمىستا بولعان كەزدە بالالاردىڭ تاربيەسىمەن ورىنباساردىڭ اناسى اينالىسادى. سوت بولاتىن كەزدە پسيحولوگ ۇلكەن ۇلىممەن سويلەسىپ، ونىڭ مەنى جاقسى كورەتىنىن ايتتى. ءبىراق ول اكەسى مەن اجەسىنىڭ ىقپالىنان شىعا المايدى. بالا ءوز تاڭداۋىن جاساي الماي وتىر. كەشەگى ۆيدەوعا بايلانىستى ۋچاسكەلىك پوليتسەيلەر «سەن الا الاسىڭ، قولىڭدا اتقارۋ پاراعى بار» دەگەسىن مەن سونداي ارەكەتكە باردىم. مەن بالانى ۇرىپ- سوققان جوقپىن. جۇرت مەنى «اقشا كەرەك بولعاسىن ءسويتىپ جاساپ جاتىر» دەپ جازىپتى. ماعان ودان ەشتەڭە كەرەك ەمەس. اليمەنت تە قاجەت ەمەس»، - دەيدى كەلىنشەك.

ال، جاناردىڭ بۇرىنعى كۇيەۋى ورىنباسار وتەشبايەۆ بالالارىن اناسىنا بەرگىسى كەلمەيتىنىن ايتادى. ءتىپتى اكەنىڭ تاربيەسىندە قالعان ۇلى مەن قىزى ناعاشىلارىنىڭ قولىنا بارعىسى كەلمەيتىنىن جاسىرمادى.

«انامىزبەن بىرگە تۇرعىمىز كەلمەيدى. ءبىز ناعاشىلارىمىزدىڭ قولىنا باراتىن بولساق، ول جۇمىس ىستەيمىن دەپ تاعى دا قالاعا كەتىپ قالادى. ءبىز وسىندا قالا بەرەمىز»، - دەيدى جانەل ورىنباسار قىزى. ال، مۇنايلى اۋدانى ءبىلىم بولىمىندەگى پسيحولوگ الدىن الا جاساعان بولجامى بويىنشا، بالالار ۇلكەندەردىڭ ايتۋىمەن ءجۇر دەگەن پىكىر ءبىلدىردى.

«ءبىز بالالاردىڭ قۇقىعىن قورعايتىن ورگانبىز، ءبىراق بالالاردى اناسىنان ايىرىپ قۇقىعىن قورعامايمىز. كوپ جاعدايدا بالا اناسىمەن بىرگە بولۋى كەرەك. اناسى بالالارىنىڭ كەۋدەسىنەن يتەرىپ تۇرعان جوق. سوت بولاردان ءبىر كۇن بۇرىن كەلدى. قۇشاقتايىن دەسە، بالالار بارعىسى كەلمەدى. سوندا پسيحولوگ مامان جاساعان قورىتىندىدا بالالارعا ۇلكەندەردىڭ ىقپالى اسەر ەتكەنى جازىلعان. بالالاردىڭ قىلىعى جاتتاندى، ۇيرەتۋلى»، - دەيدى مۇنايلى اۋداندىق ءبىلىم ءبولىمى كامەلەتكە تولماعان بالالاردىڭ قۇقىعىن قورعاۋ مامانى التىناي ەسبەرگەن.

ەستەرىڭىزگە سالا كەتەيىك، بۇعان دەيىن ماڭعىستاۋلىق ايەل بۇرىنعى كۇيەۋىنىڭ قولىنداعى بالالارىن كۇشتەپ الىپ كەتپەك بولعانى جايلى ۆيدەو الەۋمەتتىك جەلىدە تاراپ كەتكەنىن جازعان بولاتىنبىز. وقيعا 2 -قازان كۇنى باسقۇدىق اۋىلىندا بولعان. كەلىنشەك بۇرىنعى كۇيەۋىنىڭ سوت شەشىمىنە قاراماستان بالالاردى بەرمەي وتىرعانىن ايتىپ پوليتسياعا جۇگىنەدى. كامەلەتكە تولماعاندار ىستەرى جونىندەگى ينسپەكتور، سونداي- اق ۋچاسكەلىك ينسپەكتوردىڭ كومەكشىسى بالالاردىڭ تۇرعىلىقتى جەرىنە باردى. الايدا، شۋ شىعىپ، ناتيجەسىندە ءۇش بالا اكەسىمەن بىرگە قالعان.