كوروناۆيرۋس ناۋقاستارىن ەمدەيتىن كلينيكادا وتتەگى باللونى جارىلدى
تاشكەنت. قازاقپارات – 7-قازان كۇنى ساعات 08:13 تە سىرداريا وبلىسىنىڭ گۇلستان قالاسىنداعى «الپوميش» سپورت كەشەنىندە وتتەگى باللونى جارىلدى، دەپ حابارلايدى قازاقپارات وزبەكستان رەسپۋبليكاسى توتەنشە جاعدايلار مينيسترلىگىنىڭ Telegram-داعى رەسمي پاراقشاسىنا سىلتەمە جاساپ.
«وقىس وقيعا بولعان سپورت كەشەنى قازىرگى تاڭدا كوروناۆيرۋس ينفەكسياسىن جۇقتىرعان ناۋقاستارعا مەديتسينالىق كومەك كورسەتۋ ءۇشىن ۋاقىتشا كلينيكا رەتىندە جاساقتالعان. وتتەگى باللونىنىڭ جارىلۋى سالدارىنان عيماراتتىڭ تەرەزەلەرى سىنىپ، ءبىر ازامات جاراقات الدى. قازا تاپقاندار جوق. وبلىستىق توتەنشە جاعدايلار باسقارماسى مەن باسقا دا ءتيىستى ورگاندار دەرەۋ وقيعا ورنىنا كەلىپ، ازاماتتاردى قاۋىپسىز جەرگە كوشىردى. جاعداي تولىق باقىلاۋدا»، - دەپ جازدى وزبەكستان رەسپۋبليكاسى توتەنشە جاعدايلار مينيسترلىگى Telegram-داعى رەسمي پاراقشاسىندا.
ءاليحان اسقار ۇلى
