كوروناۆيرۋستان قايتىس بولعان دارىگەردىڭ وتباسىنا ەش تەكسەرۋسىز تولەماقى بەرىلسىن - پرەزيدەنت
نۇر-سۇلتان. قازاقپارات - كوروناۆيرۋستان قايتىس بولعان دارىگەردىڭ وتباسىنا تەكسەرۋ جۇرگىزىلمەستەن تولەماقى بەرىلسىن.
بۇل تۋرالى كوروناۆيرۋس ىندەتىنىڭ ەكىنشى كەزەڭىنە دايىندىق ماسەلەلەرى بويىنشا كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
ىندەتتىڭ ەكىنشى تولقىنى جاعدايىندا نەگىزگى سوققىنى تاعى دا مەديكتەر وزدەرىنە الادى. ءدارى- دارمەك پەن اپپاراتتار ەمەس، ءدال سولار ءبىزدىڭ نەگىزگى رەسۋرستارىمىز سانالادى. مەديتسينا قىزمەتكەرلەرىن قولداۋ قاجەتتىگى ەشكىمگە كۇدىك تۋدىرمايدى. مەنىڭ تاپسىرماممەن ەكىنشى جارتىجىلدىقتا تولەماقىعا 150 ميلليارد تەڭگەدەن استام قارجى ءبولىندى.
دەگەنمەن، تولەماقى مەن ساقتاندىرۋ تولەمىن الۋدا ءالى كۇنگە دەيىن بيۋروكراتيالىق كەدەرگىلەر جاسالىپ، ءتىپتى بۇل ماسەلەمەن پارلامەنت تە اينالىستى. جەرگىلىكتى جەرلەردە تولەماقى بويىنشا «سيفرلارمەن ويىن» جالعاسىپ، ولاردى ءبولۋدىڭ ءالى كۇنگە دەيىن اشىقتىعى جوق. بۇل جول بەرۋگە بولمايتىن احۋال. بۇعان قوسا، باس دارىگەرلەر جۇمىس ۋاقىتىن دارىگەردىڭ پايداسىنا ەمەس تۇزەتۋگە تىرىسادى. مەديتسينا قىزمەتكەرلەرى وزدەرىنە تيەسىلى اقشانى ءوتىنىپ سۇراپ الۋعا ءتيىس ەمەس»، - دەدى مەملەكەت باسشىسى.
ق ر پرەزيدەنتىنىڭ دەرەگىنشە، 2020 -جىلدىڭ 30-قىركۇيەگىندەگى جاعدايعا سايكەس، ىندەت كەزەڭىندە كوروناۆيرۋستان 182 مەديتسينا قىزمەتكەرى قايتىس بولدى.
«قازىر بۇل جاعدايلار ءتۇرلى كوميسسيادا قارالىپ، وتەماقى تەك 37 عانا وتباسىعا تولەنگەن. مۇلدەم جول بەرۋگە بولمايتىن جاعداي. پوستفاكتۋم ءولىم سەبەبىن انىقتاۋ كوپتەگەن قيىندىقتاردى، ونىڭ ىشىندە ادەپ سيپاتىنداعى قيىندىقتاردى تۋدىرادى. وسىعان وراي ۇكىمەتكە بۇل ماسەلەدە مۇنداي تەكسەرۋلەر جۇرگىزبەستەن قازا تاپقان مەديتسينا قىزمەتكەرىنىڭ وتباسىنا تيەسىلى بارلىق تولەماقىنى تولەۋدى تاپسىرامىن»، - دەدى قاسىم-جومارت توقايەۆ.
سونىمەن قاتار مەملەكەت باسشىسى مەديتسينا قىزمەتكەرلەرى قىزمەت بارىسىندا اۋرۋ جۇقتىرىپ العانى دالەلدەنگەن جاعدايدا قىسقا مەرزىمنىڭ ىشىندە تولەماقى مۇلتىكسىز تولەنۋى تيىستىگىن باسا ايتتى. «كوروناۆيرۋسپەن كۇرەس ءۇشىن ۇستەماقىنىڭ ءبىر بولىگىن اكىمشىلەۋ اكىمدىكتەردىڭ جەلىسى ارقىلى جۇرگىزىلەدى. وسىعان وراي ءوڭىر اكىمدەرىنە بۇل ماسەلەنى جەكە باقىلاۋدا ۇستاۋدى تاپسىرامىن»، - دەدى ق ر پرەزيدەنتى.
اۆتور: مارلان جيەمباي
