ادام اعزاسىندا كوروناۆيرۋسقا قارسى انتيدەنە قانشالىقتى ۇزاق ساقتالادى - مامان پىكىرى

بۇل تۋرالى ق ر د س م تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتى ينفەكسيالىق اۋرۋلاردى ەپيدەميولوگيالىق قاداعالاۋ باسقارماسىنىڭ باسشىسى روزا قوجاپوۆا ايتتى، دەپ حابارلايدى قازاقپارات ءتىلشىسى.

«انتيدەنە - بۇل اعزانىڭ بەلگىلى ءبىر اۋرۋدان قورعانىسى. ولار اۋرۋدى باستان كەشىرگەننەن سوڭ نەمەسە ۆاكسيناتسيادان كەيىن تابيعي جولمەن قالىپتاسادى. اعزاعا اۋرۋ قوزدىرعىشى تۇسكەن كەزدە انتيدەنە ولاردى جويىپ وتىرادى. ءبىراق، ولار كەز كەلگەن اۋرۋعا قارسى تۇرا المايدى. ەگەر ادام قىزىلشامەن اۋىرسا، وندا انتيدەنە قىزىلشا قوزدىرعىشىنا ىقپال ەتەدى. انتيدەنە ادام اعزاسىندا ءارتۇرلى ساقتالادى. ماسەلەن، تۇماۋمەن اۋىرعاننان كەيىنگى قورعانىس 6-8 ايعا سوزىلادى. يممۋندىق كۇشتى قورعانىس بولعاندا قىزىلشاعا قارسى 5 جىل، ديفتەرياعا 10 جىلعا دەيىن ساقتالادى. بارلىق اۋرۋعا بىردەي مەرزىم جوق. كوروناۆيرۋس ينفەكسياسىنا ارنالعان انتيدەنەگە قاتىستى ايتار بولساق، بۇل - جاڭا اۋرۋ. بەلگىلى ءبىر اۋرۋعا قارسى انتيدەنەنى انىقتاۋ، كوپ جاعدايدا قانشا ۋاقىت ساقتالاتىندىعىن ءبىلۋ ءۇشىن عىلىمي- زەرتتەۋ جۇمىستارى ۇزاق ۋاقىت بويى جۇرگىزىلەدى. ءبىر كەزەڭدە تۇماۋ مەن كوروناۆيرۋس ىندەتى قاباتتاسىپ كەلگەندە اعزا اۋرۋدى اۋىر وتكەرەدى. سوندىقتان ءدال قازىر تۇماۋدان بارىنشا قورعانۋعا كەڭەس بەرىلىپ وتىر. اۋرۋلار قاباتتاسقان كەزدە وتە اۋىر تيەدى»، - دەدى ول.

ونىڭ ايتۋىنشا، ۆيرۋستىق ينفەكسيالارمەن كۇرەستىڭ ءتۇرلى ادىستەرى بار. ولار جۇعۋ جولدارىنا، قورعانىس ادىستەرىنە بايلانىستى. ماسەلەن، ۆيرۋستىق ينفەكسياعا قارسى ۆاكسيناتسيا جۇقپالى اۋرۋمەن كۇرەستىڭ ءتيىمدى ءادىسى سانالادى. ال قارسى قولدانىلاتىن ۆاكسيناتسياسى جوق ينفەكسيالار جۇعۋ جولدارىنا بايلانىستى. تۇماۋ، كوروناۆيرۋس سىندى اۋا- تامشى جولىمەن تارالاتىن ينفەكسيالاردان قورعانۋدىڭ باستى ءادىسى - ماسكا تاعۋ، قولدى تازالاپ جۋۋ، ادامدار كوپ جينالاتىن جەرگە بارماۋ، ادامدار كوپ شوعىرلانعان جابىق عيماراتتا بولماۋ.

«ەگەر ادامنىڭ نەگىزگى اۋرۋى بولسا، وندا كەز كەلگەن جۇقپالى اۋرۋ وتە اۋىر وتەدى. قانت ديابەتى، جۇرەك- قان تامىرى اۋرۋلارى كەزىندە يممۋننىڭ قارسى تۇرۋى قيىنعا سوعادى. بىزدە ەمدەۋدىڭ بەكىتىلگەن كلينيكالىق حاتتاماسى بار. اتالعان حاتتاماعا سايكەس ەم تاعايىندالادى. ارينە، ادامدا نەگىزگى اۋرۋ بولسا، وندا تۇزەتۋ ەنگىزىلەدى. ەگەر بازالىق ءدارىنى تۇراقتى تۇردە قابىلداۋى قاجەت بولعان جاعدايدا كوروناۆيرۋس ينفەكتسياسىنا قارسى ءدارىنى تاعايىنداۋ بارىسىندا ەسكەرىلەدى»، - دەدى ول.

باسقارما باسشىسىنىڭ ايتۋىنشا، كەز كەلگەن اۋرۋدان جازىلىپ شىققاننان كەيىن دەنساۋلىققا ءجىتى قاراپ، دەنە قىزۋىن باقىلاۋدا ۇستاعان ءجون. اعزاعا قوسىمشا جۇكتەمە دە تۇسىرۋگە بولمايدى. جاقسى تاماقتانىپ، دارۋمەندەر ءىشۋ قاجەت. «ال كوروناۆيرۋستان قورعانۋ ۇسىنىستارى - ماسكا رەجيمىن، الەۋمەتتىك اراقاشىقتىقتى ساقتاۋ، اۋىرعان اداممەن بايلانىسپاۋ، بۇقارالىق شارالارعا بارماۋ، بولمە اۋاسىن ۇنەمى تازارتۋ. بۇل شارالاردى كەز كەلگەن ادام ورىنداي الادى»، - دەدى روزا قوجاپوۆا.

اۆتور: مارلان جيەمباي