ءسۇت ونىمدەرى يمپورتىن قىسقارتۋ ءۇشىن قانداي شارالار قابىلداندى

«ءسۇت ونىمدەرى بويىنشا ىشكى نارىقتا ىرىمشىك پەن سۇزبە، قويۋلاندىرىلعان جانە قۇرعاق ءسۇت بويىنشا يمپورت كولەمى بار. ءسۇت شيكىزاتىنا قايتا ەسەپتەگەندەگى ءسۇت ونىمدەرى يمپورتىنىڭ جالپى كولەمى شامامەن 500 مىڭ توننانى قۇرايدى. وتاندىق ءسۇت زاۋىتتارى بۇل تاۋارلاردى وزدەرى وندىرە الادى، دەگەنمەن ولاردىڭ وندىرىستىك قۋاتتارى تولىق جۇكتەلمەگەن. ساپالى تاۋارلىق ءسۇت شيكىزاتىن ءوندىرۋ كولەمىن ۇلعايتۋ ماسەلەسىن شەشۋ قاجەت. سوندىقتان مينيسترلىك ورتا مەرزىمدى پەرسپەكتيۆادا ونەركاسىپتىك تاۋارلىق ءسۇت فەرمالارىن ىسكە قوسۋ جانە ولاردىڭ قۋاتتىلىقتارىن كەڭەيتۋ ەسەبىنەن تاۋارلىق ءسۇت ءوندىرىسىن ۇلعايتۋ مىندەتىن العا قويىپ وتىر»، - دەدى مينيستر ۇكىمەت وتىرىسىندا.

ءسۇتتى مال شارۋاشىلىعىن دامىتۋدى ىنتالاندىرۋ ءۇشىن مينيسترلىك مىناداي شارالار قابىلدادى: ءسۇت فەرمالارىن سالۋ كەزىندەگى مىندەتتى مەملەكەتتىك ساراپتاما تالابى الىپ تاستالدى، بۇل فەرمالاردى جوبالاۋ مەرزىمىن التى ايدان ءبىر جارىم ايعا دەيىن قىسقارتۋعا مۇمكىندىك بەردى. «ەكىنشى دەڭگەيدەگى بانكتەردىڭ كرەديتتەرىنە قولجەتىمدىلىكتى قامتاماسىز ەتۋ ماقساتىندا كرەديت سوماسىنىڭ % 85- نا دەيىن ينۆەستوردىڭ قارىزدارىن كەپىلدەندىرۋ تەتىگى ەنگىزىلدى. ءسۇتتى، ساتىپ الىنعان اسىل تۇقىمدى مالدى سۋبسيديالاۋ نورماتيۆتەرى، ينۆەستيتسيالىق سۋبسيديالاۋ نورماتيۆتەرى قايتا قارالدى. مالدىڭ ءوزىن كەپىلگە قويا وتىرىپ، اسىل تۇقىمدى مالدى ساتىپ الۋدى قارجىلاندىرۋ قۇرالى ەنگىزىلدى»، - دەپ ناقتىلادى س. وماروۆ.

ونىڭ سوزىنە قاراعاندا، اتالعان وزگەرىستەر اۋىل شارۋاشىلىعى تاۋارىن وندىرۋشىلەرىنىڭ ىسكەرلىك بەلسەندىلىكتەرىنە وڭ اسەر ەتتى. ەگەر بۇدان بۇرىن جىلىنا 3-5 ونەركاسىپتىك ءسۇت فەرماسى ىسكە قوسىلسا، بيىل جالپى قۋاتى 107 مىڭ توننا ءسۇت بولاتىن 33 ءسۇت فەرماسى جوباسى ىسكە اسىرىلۋدا.

جالپى، كەشەندى جوسپاردىڭ ينديكاتيۆتىك تاپسىرماسى اياسىندا جىل سايىن 35 ونەركاسىپتىك تاۋارلىق ءسۇت فەرماسىن ىسكە قوسۋ جوسپارلانۋدا. قازىرگى ۋاقىتتا وبلىس اكىمدىكتەرىمەن الداعى جىلعا 39 ءسۇت فەرماسىن سالۋ جوبالارى پىسىقتالدى. مىندەتتەردى ىسكە اسىرۋ ءۇشىن كرەديت بەرۋ جانە مەملەكەتتىك قولداۋ كورسەتۋ ماقساتتارىنا 3 جىلعا قوسىمشا 147 ميلليارد تەڭگە ءبولۋ قاجەت ەتىلەدى. بۇدان باسقا، الماتى، پاۆلودار جانە سولتۇستىك قازاقستان وبلىستارىنداعى سەكىلدى ءسۇت فەرمالارىن سالۋدى قارجىلاندىرۋ ءۇشىن الەۋمەتتىك- كاسىپكەرلىك كورپوراتسيالاردى تارتۋدى ورىندى دەپ سانايمىز.

اۆتور: رۋسلان عابباسوۆ