پەتروپاۆلدا جاس ءوسپىرىم ءبىر كۇندە ءۇش ۆەلوسيپەد ۇرلاعان

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ءتارتىپ ساقشىلارىنا پەتروپاۆلداعى زالمانوۆ كوشەسىندەگى ۇيلەردىڭ ءبىرىنىڭ تۇرعىنى «دەسنا» ماركالى ۆەلوسيپەدتىڭ ۇرلانعانى تۋرالى ارىزدانعان. ول ۆەلوسيپەدتى ۇلىنىڭ تۋعان كۇنىنە سىيعا ساتىپ العان ەكەن. سول كۇنى ءبىر ساعات وتەر-وتپەستەن اباي كوشەسىندە تاعى ەكى ۆەلوسيپەدتىڭ ۇرلانعانى تۋرالى حابارلاما كەلىپ تۇسەدى.

كريمينالدىق پوليتسيا قىزمەتكەرلەرى جەدەل- ىزدەستىرۋ شارالارىن جۇرگىزىپ، ناتيجەسىندە ۆەلوسيپەد ۇرلادى دەگەن كۇدىكپەن جۇمىسشى كەنتىنىڭ 17 جاستاعى تۇرعىنىن ۇستادى. جاس ءوسپىرىم بۇعان دەيىن دە ءتۇرلى قۇقىق بۇزۋشىلىقتار جاساعانى ءۇشىن جاۋاپقا تارتىلعان بولىپ شىقتى. جاۋاپ الۋ بارىسىندا ول ۆەلوسيپەدتەردى قالاي ۇرلاعانىن رەت-رەتىمەن ايتىپ بەردى. «دەسنا» ۆەلوسيپەدىن ءمىنىپ كەتىپ، اباي كوشەسىنە شىقتىم. جولاي ءبىر ءۇيدىڭ پودەزىندە قىمباتتاۋ ۆەلوسيپەدتى كوردىم.

«دەسنانى» سول جەردە قالدىرىپ، ەكىنشىسىنە ءمىندىم. كەيىن رۋجەينيكوۆ كوشەسىندە ءۇشىنشى ۆەلوسيپەدتى ۇرلاپ، ءوتىپ بارا جاتقان ادامعا 20 مىڭ تەڭگەگە ساتىپ جىبەردىم»، - دەيدى كۇدىكتى.

قازىر اتالعان دەرەكتەرگە «ۇرلىق» بابى بويىنشا سوتقا دەيىنگى تەرگەپ-تەكسەرۋ جۇرگىزىلۋدە.

ايتا كەتەيىك، قالالىق پوليتسيا باسقارماسىندا ۆەلوسيپەدتەردىڭ دەرەكتەر بازاسى اشىلعان. وعان ۆەلوسيپەدتەردىڭ نومىرلەرى، ماركالارى، ءتۇسى جانە يەلەرىنىڭ بايلانىس دەرەكتەرى ەنگىزىلگەن. اقپارات ۇدايى تولىقتىرىلىپ تۇرادى. جىل باسىنان بازاعا 1212 ۆەلوسيپەدكە قاتىستى مالىمەت ەنگىزىلدى. بۇل مالىمەتتەر پوليتسەيلەرگە ۇرلانعاندى جىلدام انىقتاۋعا، قىلمىستى اشۋعا كومەكتەسەدى. بازاعا ۆەلوسيپەد تۋرالى مالىمەت ەنگىزۋ ءۇشىن بار بولعانى قالانىڭ كەز-كەلگەن ۋچاسكەلىك پۋنكتىنە بارىپ، ارنايى ساۋالنامانى تولتىرۋ قاجەت.

اۆتور: اقەركە داۋرەنبەك قىزى