دونالد ترامپ پەن ونىڭ ايەلى كوروناۆيرۋس جۇقتىردى

پرەزيدەنت ترامپ ءوزىنىڭ جانە زايىبىنىڭ COVID-19 جۇقتىرعانى تۋرالى جاڭالىقتى Twitter- دەگى رەسمي پاراقشاسىندا جۇما كۇنى راستادى.

«بۇگىن كەشكە ا ق ش-تىڭ ءبىرىنشى حانىمى جانە مەن كوروناۆيرۋسقا تەست تاپسىردىق. ول وڭ ناتيجە كورسەتتى. ءبىز دەرەۋ كارانتينگە شىعىپ، ەم قابىلداۋدى باستاپ كەتتىك. ءبىز بۇنى بىرگە ەڭسەرەمىز!» - دەپ جازدى پرەزيدەنت Twitter - دە.

CNN-نىڭ حابارلاۋىنشا، بۇعان دەيىن ا ق ش پرەزيدەنتى الەۋمەتتىك جەلىدە ءوزىنىڭ كەڭەسشىسى حوۋپ حيكستەن كوروناۆيرۋس انىقتالعاننان كەيىن زايىبى ەكەۋىنىڭ كارانتينگە كەتەتىنىن جازعان بولاتىن.

«ءۇزىلىسسىز كوپ جۇمىس ىستەگەن حوۋپ حيكستىڭ كوروناۆيرۋسقا تاپسىرعان تەستى وڭ ناتيجە بەردى. ەندى تاپسىرعان تەستىڭ ناتيجەسىن كۇتەمىز. وسى ۋاقىت ارالىعىندا ءبىز كارانتين تالاپتارىن ساقتايتىن بولامىز»، - دەدى ترامپ. حوۋپ حيكس دونالد ترامپپەن بىرگە كوپتەگەن ساپاردا، سونىڭ ىشىندە سەيسەنبى كۇنى كليۆلەندكە پرەزيدەنتتىك پىكىرسايىسقا قاتىسۋ ءۇشىن بارعان ساپارىندا بىرگە ءجۇردى.

CNN سول كۇنى ا ق ش پرەزيدەنتىنىڭ تىكۇشاعىنا وتىرعىزۋ كەزىندە حيكستە دە، اق ءۇي باسشىسىنىڭ وزگە دە كەڭەسشىلەرىندە ماسكا بولماعانىن حابارلاعان بولاتىن. حيكستىڭ كوروناۆيرۋسقا تاپسىرعان تەستى وڭ ناتيجە كورسەتكەنى تۋرالى اقپاراتتى ءبىرىنشى بولىپ Bloomberg جاڭالىقتار اگەنتتىگى حابارلادى.

اۆتور: اياۋلىم التىنبەك