«كولساي كولدەرى» پاركى يۋنەسكو- ىڭ الەمدىك بيوسفەرالىق رەزەرۆاتتار تىزىمىنە كىرۋى مۇمكىن
بۇل تۋرالى 30-قىركۇيەكتە ەكولوگيا ءمينيسترىنىڭ ورىنباسارى ەرلان نىسانبايەۆتىڭ قاتىسۋىمەن وتكەن «كولساي كولدەرى» مەملەكەتتىك ۇلتتىق تابيعي پاركىنىڭ دامۋ تۇجىرىمداسىنىڭ تانىستىرىلىمى بارىسىندا ايتىلدى، دەپ حابارلايدى قازاقپارات ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتىنە سىلتەمە جاساپ.
«كەشە پاريجدەگى ءبىزدىڭ ديپلوماتتارىمىز «كولساي كولدەرىن» يۋنەسكو- نىڭ بۇكىل الەمدىك رەزەرۆاتتار قاتارىنا قوسۋ تۋرالى ءوتىنىش بەرگەنىن حابارلايمىن. ءبىر جىل ىشىندە وتىنىشكە باعا بەرىلەدى. شامامەن كەلەر جىلدىڭ ماۋسىم ايىندا شەشىم قابىلدانادى»، - دەدى يۋنەسكو- نىڭ قازاقستاندىق «ادام جانە بيوسفەرا» ۇلتتىق كوميتەتتىڭ ءتوراعاسى، زوولوگيا ينستيتۋتىنىڭ باس ديرەكتورى رومان ياشەنكو جيىن بارىسىندا.
ونىڭ سوزىنشە، ۇلتتىق پارك اتالعان تىزىمگە كىرۋ ارقىلى حالىقارالىق دەڭگەيگە كوتەرىلەدى. الەمدىك قاۋىمداستىق الدىندا ەكوجۇيەنى ساقتاۋعا قاتىستى جاۋاپكەرشىلىك ارتادى. قازىر ەكولوگيا، گەولوگيا جانە تابيعي رەسۋرستار مينيسترلىگى «كولساي كولدەرى» ۇلتتىق پاركىندە ەكوتۋريزمدى دامىتۋدى قولعا الماق. باستى يدەيا - وندا تۋريستەردىڭ كەلۋىن قامتاماسىز ەتە وتىرىپ، ەكوجۇيەگە زيان كەلتىرمەۋ. «كولساي كولدەرى» ۇلتتىق پاركىندە ەكوتۋريزمدى دامىتۋدى قولعا العان ينۆەستور جۇمىسىن باقىلايتىن قوعامدىق كەڭەس تە قۇرىلماق.
