قازاقستاندا ءدارى- دارمەكتىڭ ەكى ايلىق قورى جاسالدى
نۇر- سۇلتان. قازاقپارات - COVID-19 ىندەتىنىڭ ءورشۋ قاۋپىنىڭ ىقتيمالدىعىنا بايلانىستى ءدارى- دارمەكتىڭ ەكى ايلىق قورى جاسالعان.
بۇل تۋرالى «سك- فارماتسيا» ج ش س باسقارما ءتوراعاسى ەرحات ەسقالييەۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىنگە دەيىن ايماقتار جالپى قۇنى 16,6 ميلليارد تەڭگە بولاتىن قوسىمشا قاجەتتى ءدارى- دارمەككە ءوتىنىم بەردى. 22-شىلدەدەن باستاپ ءبىز بۇكىل مەديتسينالىق ۇيىمدا، ينفەكتسيالىق جانە پروۆيزورلىق ستاتسيوناردا ءدارى- دارمەكتىڭ ءبىر ايلىق قورىن قالىپتاستىرۋ تۋرالى شەشىمگە كەلگەن ەدىك. بۇل شارا ستاتسيونارلاردا قورلاردى قۇرىپ، ءدارى- دارمەك بويىنشا قاۋىرت قاجەتتىلىكتى جابۋعا كومەكتەسەدى»، - دەدى ەرحان ەسقاليەۆ ۇكىمەت وتىرىسىندا.
ونىڭ ايتۋىنشا امبۋلاتوريالىق دەڭگەيدە بەرىلەتىن ءدارى- دارمەكتىڭ ءتىزىمى دە كەڭەيتىلگەن. اۋرۋدى جەڭىل كوتەرەتىن ازاماتتار ەمحانالاردان ىستىق تۇسىرەتىن دارىلەر مەن انتيكواگۋليانتتاردى الا الادى.
«بۇگىنگى كۇنى ازايمايتىن قالدىق بويىنشا ەكى ايلىق قور قالىپتاستىرىلدى. قۇنى 8,2 ميلليارد تەڭگەگە COVID-19 اۋرۋىنا قارسى قاجەتتى ءدارى- دارمەكتىڭ 44 ءتۇرى ساتىلىپ الىنۋدا. ول ءبىر اي بويى التى مىڭ ناۋقاستى ستاتسيونارلاردا ەمدەۋگە جەتەدى. ازايمايتىن قالدىقتىڭ كولەمى ايماقتاردىڭ سۇرانىسىنا قاراماي جينالعانىن اتاپ وتكىم كەلەدى. كوروناۆيرۋستىڭ ەكىنشى تولقىنى تۋىنداعان جاعدايدا ول قاجەتتىلىكتى جاۋىپ بەرەدى. ءدارى- دارمەك كولەمى حابتاردا ساقتالادى»، - دەدى ول.
