توكيو وليمپياداسىنا ىرىكتەۋ تۋرنيرلەرى قاشان باستالادى

نۇر-سۇلتان. قازاقپارات - كوروناۆيرۋس پاندەمياسىنىڭ سالدارىنان الەمدەگى ەڭ ايتۋلى سپورتتىق شارا - جازعى وليمپيادا ويىندارى كەلەسى جىلعا شەگەرىلدى.

توكيودا توپ جارۋدى اڭساعان سپورتشىلار ءتورت جىلدىقتىڭ باستى دوداسىنا تاعى ءبىر جىل دايىندالاتىن بولدى. وسى رەتتە ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتىنە وليمپيادا ويىندارىنا قاتىستى ءبىرقاتار ساۋال جولداپ كورگەن ەدىك.

قازاقپارات اگەنتتىگىنىڭ رەسمي ساۋالىنا جاۋاپ بەرگەن كوميتەت وليمپيادا ويىندارىنا جولداما وينالاتىن ليتسەنزيالىق جارىستاردىڭ ءبارى كەيىنگە قالعانىن حابارلادى.

«قازىرگى ۋاقىتتا كوروناۆيرۋستىڭ تارالۋ جاعدايىنا قاراپ سپورت تۇرلەرىنەن حالىقارالىق فەدەراتسيالار حالىقارالىق سپورت ءىس- شارالارىنىڭ كۇنتىزبەلىك جوسپارىن پىسىقتاۋدا. اتالعان كۇنتىزبە ناقتىلانعاننان كەيىن قازاقتان رەسپۋبليكاسى ۇلتتىق وليمپيادا كوميتەتىمەن، سپورت تۇرلەرىنەن اككرەديتتەلگەن سپورتتىق فەدەراتسيالارمەن، جاتتىقتىرۋشىلار كەڭەسىمەن بىرگە قارالىپ، وتاندىق سپورتشىلاردىڭ دايىندىق جوسپارلارىنا ءتيىستى وزگەرىستەر ەنگىزىلەدى»، - دەپ حابارلايدى كوميتەتتەن.

بۇگىنگە دەيىن قازاقستان سپورتشىلارى 17 سپورت تۇرىنەن 42 ليتسەنزيا جەڭىپ العان.

ناقتىراق ايتقاندا سپورتشىلار جەڭىل اتلەتيكادان 3 ليتسەنزيا (گەورگي شەيكو، ولگا رىپاكوۆا، ايمان راتوۆا)، تاسجولداعى ۆەلوسيپەد سپورتى 4 ليتسەنزيا، جۇزۋدەن 2 (دميتري بالاندين)، اشىق سۋدا جۇزۋدەن 1 (ۆيتالي حۋدياكوۆ)، ساداق اتۋدان 4 (مۇسايەۆ سانجار، گانكين دەنيس، ابدۋللين يلفات)، سپورتتىق قۇزعا ورمەلەۋدەن 1 (ريشات حايبۋللين) ۇيلەسىمدى جۇزۋدەن 1 (الەكساندرا جانە ەكاتەرينا نەميچ) گرەك-ريم كۇرەسىنەن 2 (مەيرامبەك ايناعۇلوۆ، اسحات دىلمۇحامەدوۆ)، ايەلدەر كۇرەسىنەن 2 (ۆالەنتينا يسلاموۆا، ەلميرا سىزدىقوۆا)، ەركىن كۇرەستەن 4 (نۇريسلام سانايەۆ، داۋلەت نيازبەكوۆ، دانيار قايسانوۆ، الىشەر ەرعالي)، سپورتتىق گيمناستيكادان 1 (ميلاد كاريمي)، ستەند اتۋدان 1 (رىسبەكوۆا سارسەنگۇل)، نىسانا كوزدەۋدەن 1 (يۋركوۆ يۋري)، قازىرگى بەسسايىستان 2 (پوتاپەنكو ەلەنا، يلياشەنكو پاۆەل)، كاراتە WKF- تان (دارحان اسادىلوۆ)، بوكستان (ەرلەر) 8 ليتسەنزيا (ساكەن بيبوسىنوۆ، تەمىرجان سەرىك، سافيۋللين زاكىر، ءجۇسىپوۆ ابىلايحان، امانقۇل ءابىلحان، نۇرداۋلەتوۆ بەكزات، لەۆيت ۆاسيلي، قامشىبەك قوڭقابايەۆ)، بوكس (ايەلدەر) 1 ليتسەنزيا (ريابەتس نادەجدا) ۇتىپ العان.

كوميتەتتىڭ حابارلاۋىنشا، ق ر باس مەملەكەتتىك سانيتار دارىگەرىنىڭ قاۋلىسىنا سايكەس، ۇلتتىق قۇراما كوماندالاردىڭ دايىندىعىن ۇيىمداستىرۋعا قاتىستى بارلىق سپورتتىق وبەكتىلەر سانيتارلىق- ەپيدەميالىق تالاپتاردى ساقتاي وتىرىپ، جۇمىس ىستەپ جاتىر.

سونداي-اق 2021 -جىلى جازعى وليمپيادا ويىندارىندا مەدال العان سپورتشىلاردىڭ سىياقىسى بۇرىنعىداي قالاتىن بولدى. ياعني حالىقارالىق سپورتتىق جارىستاردىڭ چەمپيوندارى مەن جۇلدەگەرلەرىنە، جاتتىقتىرۋشىلارعا جانە سپورت تۇرلەرى بويىنشا قازاقستان رەسپۋبليكاسى قۇراما كوماندالارىنىڭ (سپورت تۇرلەرى بويىنشا ۇلتتىق قۇراما كوماندالاردىڭ) مۇشەلەرىنە اقشالاي كوتەرمەلەۋدىڭ مولشەرى ۇكىمەتتىڭ 2020 -جىلعى 27-ناۋرىزداعى قاۋلىسىمەن بەكىتىلگەن.

ياعني جازعى، قىسقى وليمپيادا، پاراليمپيادا، سۋردليمپيادا ويىندارىندا I ورىن العاندارعا - 250 مىڭ ا ق ش دوللارى، Ⅱ ورىن العاندارعا - 150 مىڭ ا ق ش دوللارى، Ⅲ ورىن العاندارعا - 75 مىڭ ا ق ش دوللارى، IV ورىن العاندارعا - 30 مىڭ ا ق ش دوللارى، V ورىن العاندارعا - 10 مىڭ ا ق ش دوللارى، Ⅵ العان سپورتشىلارعا - 5 مىڭ ا ق ش دوللارىنان بەرىلەدى.

اۆتور: ايان بەكەن ۇلى