مينيستر جىل سوڭىنا دەيىن ازىق-تۇلىك تاۋارلارى باعاسى قانشا كولەمدە وسەتىنىن ايتتى

بۇل تۋرالى ق ر ساۋدا جانە ينتەگراتسيا ءمينيسترى باقىت سۇلتانوۆ ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ باعالاۋىمىزشا، الەۋمەتتىك ماڭىزى بار ازىق- تۇلىك تاۋارلارى باعاسىنىڭ ءوسۋى تۇراقتانادى جانە جىل سوڭىنا دەيىن 6 پايىزدان اسپايدى. بۇل بولجام بارلىق قولدانىستاعى فاكتورلاردى جانە باعانى تۇراقتاندىرۋ بويىنشا جوعارىدا اتالعان مەملەكەت قابىلداعان شارالاردى ەسكەرە وتىرىپ جاسالدى. تۇتاستاي العاندا، وركەنيەتتى بولشەك ساۋدا مەن ساۋدا ينفراقۇرىلىمىن دامىتۋ بويىنشا جۇرگىزىلىپ جاتقان جۇيەلى جۇمىس، اينالىم سحەماسىن قارجىلاندىرۋ، الەۋمەتتىك ماڭىزى بار ازىق- تۇلىك تاۋارلارىنا باعالاردى تەجەۋ جونىندەگى جول كارتاسى اياسىنداعى جۇمىستاردىڭ مونيتورينگى مەن ۇيلەستىرىلۋىن كۇشەيتۋ، «ازىق- تۇلىك كورپوراتسياسى» رەسۋرستارىن ۇتىمدى ءبولۋدى قامتاماسىز ەتۋ باعانى تۇراقتاندىرۋدىڭ نەگىزگى فاكتورلارى بولىپ سانالادى»، - دەدى مينيستر ۇكىمەت وتىرىسىندا.

ونىڭ سوزىنە قاراعاندا، نارىق تاراپىنان باعانىڭ تومەندەۋىنە ءبىرىنشى كەزەكتە اۋىل شارۋاشىلىعىنداعى ءوندىرىس كولەمىنىڭ ءوسۋى مەن وركەنيەتتى بولشەك ساۋدا دامۋى وڭ اسەر ەتەدى.

«باعالاردى ونلاين رەجيمدە مونيتورينگىلەۋ ءۇشىن مينيسترلىكتىڭ اۋماقتىق بولىمشەلەرى مەن اكىمدىكتەر dosmart.kz ونلاين جۇيەسىن پايدالانادى. بۇل جۇيە ML تەحنولوگيالارىمەن وڭدەۋگە جانە %1 كەش-بەك الۋعا ارنالعان فوتو چەكتەردى قوسا، جەكە تۇلعالاردان وزەكتى دەرەكتەردى جيناۋدى قامتاماسىز ەتۋگە، سونداي-اق دۇكەندەردە باعالار مەن ونىمدەردىڭ بار-جوعىن مونيتورينگىلەۋدى جۇزەگە اسىرۋعا مۇمكىندىك بەرەدى»، - دەپ توقتالدى ب. سۇلتانوۆ.

قازىرگى ۋاقىتتا باعانى تۇراقتاندىرۋ شەڭبەرىندە مينيسترلىك مىناداي جۇيەلى جۇمىستار جۇرگىزۋدە: ستاتسيونارلىق ەمەس ساۋدا بازارلارىن جاڭعىرتۋ جانە ساۋدا جابدىقتارىن ساتىپ الۋ ءۇشىن ۇزاق مەرزىمدى قارجىلاندىرۋعا قول جەتكىزۋدى قامتاماسىز ەتۋ؛ ەلەكتروندىق ساۋدانى دامىتۋ جونىندەگى شارالار كەشەنىن ازىرلەۋ؛ ۇلتتىق تاۋار وتكىزۋ جۇيەسىن قۇرۋ بويىنشا جۇمىس جۇرگىزىلۋدە. بۇدان بۇرىن حابارلانعانداي، 2020 -جىلدىڭ باسىنان الەۋمەتتىك ماڭىزى بار ازىق-تۇلىك تاۋارلارىنىڭ باعاسى 4,4 پايىزعا ءوستى.

اۆتور: رۋسلان عابباسوۆ