الماتىنىڭ باس سانيتار دارىگەرى تۇماۋدان قورعانۋدىڭ بىرنەشە ءتاسىلىن اتادى
ونىڭ ايتۋىنشا، تۇماۋدان قورعانۋدىڭ ۆاكسينادان باسقا قاراپايىم شارالارى بار. «دارىگەردىڭ رۇقساتىمەن ۆيرۋسقا قارسى پرەپاراتتاردى «انافەرون»، «ينتەرفەرون»، «ۆيفەروندى» قولدانۋعا بولادى. سونىمەن قاتار، ۆيرۋسقا قارسى جاقپامايلاردى «وكسالين»، «ءانتيۆيردى» پايدالانۋ كەرەك. يممۋنيتەتتى كوتەرەتىن اقۋىزعا، دارۋمەندەرگە جانە مينەرالدى زاتتارعا باي تاماق ونىمدەرىن تۇتىنعان ءجون. الەۋمەتتىك اراقاشىقتى ساقتاۋ، ناۋقاس ادامدارمەن قارىم- قاتىناستى شەكتەۋ، ادامدار كوپ جينالاتىن جەرلەرگە بارماۋ، مەزگىلگە سايكەس كيىنۋ كەرەك» - دەدى جانداربەك بەكشين.
سونىمەن قاتار، ول حالىق كوپ جينالاتىن جەرلەر مەن ناۋقاسقا كۇتىم جاساعاندا ناۋقاس ادام دا، دەنى ساۋ ادام دا مەديتسينالىق بەتپەردە كيۋى قاجەتتىگىن ايتتى.
«ناۋقاس ۇيدە بولعاندا ونى وقشاۋلاپ، بولمەنى ءجيى جەلدەتىپ، ناۋقاس جانە ۇيدەگىلەر ماسكا كيىپ ءجۇرۋ، سونىمەن قوسا ناۋقاسقا جەكە ىدىس بولگەن دۇرىس. قولدى ءجيى جۋۋ كەرەك، ەگەر قولدى سابىنمەن جۋۋعا مۇمكىندىك بولماسا، قۇرامىندا سپيرت بار نەمەسە دەزينفەكتسيالىق قۇرالداردى پايدالانۋ قاجەت. اتا- انالار اۋىرعان بالاسىن بالاباقشاعا، مەكتەپكە جىبەرمەۋى كەرەك. وسى اتالعان قاراپايىم نۇسقاۋلاردى ساقتاۋ سىزدەردى جرۆي مەن تۇماۋ اۋرۋىنان قورعايدى»، - دەدى ول.
