مينيستر كوروناۆيرۋستىڭ كەزەكتى تولقىنىنىڭ بولۋ-بولماۋىنا نەنىڭ ىقپال ەتەتىنىن ايتتى

بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.

«ءبىز شامامەن 5 مىڭ وكپەنى جاساندى جەلدەتۋ اپپاراتىن ساتىپ الۋدى جوسپارلاعان ەدىك. قازىرگى ۋاقىتتا جەتكىزىلىپ تە جاتىر. قازاقستان اۋرۋحانالارىندا بۇگىندە 3 مىڭنان استام اپپارات ورناتىلدى. 1,5 مىڭ اپپاراتتى وتاندىق وندىرۋشىلەر شىعارعان. تاياۋ بىرنەشە اپتانىڭ ىشىندە بارلىق اپپارات جەتكىزىلەتىن بولادى»، - دەدى الەكسەي سوي.

ونىڭ دەرەگىنشە، بۇگىندە ەلىمىزدىڭ اۋرۋحانالارىندا كوروناۆيرۋسپەن جانە وكپە قابىنۋىمەن شامامەن 4,8 مىڭ پاتسيەنت ەم الىپ جاتىر.

«قازىر احۋال تۇراقتى. كورشىلەس ەلدەردە، اسىرەسە ەۋروپا وڭىرىندە، ت م د ەلدەرىندە اۋرۋ ءوسىمى بايقالادى. سوندىقتان ءبىز ءۇشىن وسى احۋالدى ۇستاپ قالۋ وتە ماڭىزدى. كورسەتكىشتەر جاقسى بولعانىنا قاراماستان توسەك- ورىن قورىن ۇلعايتىپ، ءدارى-دارمەك ساتىپ الىپ جاتىرمىز. جەكە قورعانىس قۇرالدارىمەن، ماسكامەن قامتاماسىز ەتەمىز. ءبىز ىندەتتىڭ كەلەسى تولقىنىنا دايىندالۋدامىز. ارينە، ءبىز ءۇشىن ونىڭ بولماعاندىعى وتە ماڭىزدى. ەڭ ماڭىزدى فاكتى - الەۋمەتتىك اراقاشىقتىق پەن ماسكا. اۋردىڭ 30 پايىزى ماسكا تاعۋعا جانە 40 پايىزى الەۋمەتتىك اراقاشىقتىقتى ساقتاۋعا بايلانىستى ەكەندىگىن بىرنەشە مارتە ايتتىق. وسىنى ۇستانۋعا شاقىرامىز. ىندەت تولقىنىنىڭ بولۋىنا نە بولماۋىنا ءبىز ءوزىمىز ىقپال ەتەمىز. ءبىزدىڭ ءارقايسىمىز وسىناۋ احۋالعا ىقپال ەتە الامىز. قازىر دەنساۋلىق ساقتاۋ جۇيەسىنە كەلەسى تولقىنعا دايىندىق پەن الدىن الۋ- ءتۇسىندىرۋ جۇمىستارى عانا بايلانىستى. ال قالعانى ءبىزدىڭ ءارقايسىمىزعا، ءجيى قارىم- قاتىناستا بولۋىمىزعا، ماسكا تاعۋىمىزعا بايلانىستى ەكەندىگى انىق»، - دەدى الەكسەي سوي.

ايتا كەتەيىك، بۇگىن ەلورداداعى №6-قالالىق ەمحانادا ق ر دەنساۋلىق ساقتاۋ ءمينيسترى الەكسەي سوي ماۋسىمدىق تۇماۋعا قارسى ەكپە سالدىرعان ەدى.

اۆتور: مارلان جيەمباي