قوردايدا سۋ قويماسى اياق استىنان جاسىل تۇسكە بويالدى

تامىز ايىنىڭ باسىندا سۋ ايدىنىنىڭ ءتۇسى اياق استىنان جاپ- جاسىل بولىپ كەتكەن. ماسانشى اۋىلىنىڭ تۇرعىندارى سۋدىڭ ەرەكشە تۇسىنە تاڭعالىپ، ونىڭ سۋرەتى مەن ۆيدەوسىن الەۋمەتتىك جەلىدە جاريالادى. اۋىل حالقىنىڭ ايتۋىنشا، ولار مۇنداي جاعدايدى ءبىرىنشى رەت كورىپ وتىر. ولار قاۋىپسىزدىك ءۇشىن بالالارىن ايدىننىڭ ماڭىنا جولاتپاي، سۋعا شومىلۋىنا تىيىم سالعان. «قازسۋشار» ر م ك ماماندارى اۋىل تۇرعىندارىمەن بىرگە قاراقوڭىز سۋىنان سىناما الىپ، قوردايداعى سانيتارلىق- ەپيدەميولوگيالىق ستانسانىڭ زەرتحاناسىنا جولداعان. الايدا بۇل زەرتحانادا تەك ىشەتىن سۋعا زەرتتەۋ جۇرگىزىلەدى ەكەن، ال مىنا اعىن سۋدى وبلىس ورتالىعىندا عانا ساراپتامادان وتكىزۋگە مۇمكىندىك بار. 4 -تامىزدا قاراقوڭىز سۋ قويماسىنا جامبىل وبلىسىنىڭ ەكولوگيا دەپارتامەنتىنەن ءۇش مامان كەلىپ، جاعالاۋ بويىن تەكسەردى، بىرنەشە نۇكتەدەن سىناما الدى.

«تاياۋدا سول زەرتتەۋدىڭ قورىتىندىسى شىقتى، - دەيدى قورداي اۋدانى اكىمىنىڭ ورىنباسارى مىرزاعالي كۇزەربايەۆ. - قورقاتىنداي ەشتەڭە جوق، بارلىق كورسەتكىشتەر ءوز قالپىندا. تەك كەي كومپونەنتتەر بويىنشا كونتسەنتراتسيانىڭ ءتيىستى مولشەرى جوعارىلاعانى بەلگىلى بولدى. ءبىراق سۋدىڭ جاسىل تۇسكە بويالۋىنا ول ەمەس، تابيعي قۇبىلىس سەبەپ بولعان. ياعني، سۋداعى بالدىرلار فوتوسينتەز پروتسەسىندە سۋدىڭ ءتۇسىن وزگەرتىپ جىبەرگەن» .

مىرزاعالي كۇزەربايەۆتىڭ ايتۋىنشا، ەكولوگيا دەپارتامەنتىنىڭ ماماندارى سۋ قويماسىن بىرنەشە كۇن بويى باقىلاعان. بۇگىندە سۋدىڭ بەتى قايتادان ءوزىنىڭ ۇيرەنشىكتى تۇسىنە بويالعان. «الاڭداۋدىڭ قاجەتى جوق. كولدىڭ فلوراسى مەن فاۋناسى زارداپ شەككەن جوق» دەيدى ول. ايتا كەتەيىك، قاراقوڭىز - جامبىل وبلىسىنداعى ەڭ ءىرى سۋ ايدىندارىنىڭ ءبىرى. ونىڭ سۋى ەگىن القاپتارىن سۋارۋعا پايدالانىلادى.