قازاقستاننىڭ تۇماۋعا دايىندىعى: قاۋىپ مەرزىمى مەن بولجامدار

جاقىندا دەنساۋلىق ساقتاۋ ءمينيسترى الەكسەي سوي ءبىرىڭعاي ديستريبيۋتوردىڭ تۇماۋعا قارسى 2 ميلليون 199 مىڭ 990 ۆاكتسينا ساتىپ العانىن ءمالىم ەتكەن ەدى. وسى ورايدا ەلىمىزدە تۇماۋعا قارسى ەكپە مەرزىمنەن ەكى اپتا بۇرىن باستالادى، ياعني 15-قىركۇيەكتەن ىسكە اسىرىلادى.

«جىل سايىن تۇماۋدان ۆاكتسينا ەگۋ 1-قازاندا باستالاتىن. الايدا كوروناۆيرۋس ىندەتىنە بايلانىستى بيىل ناۋقان ەكى اپتا بۇرىن باستالادى. 15- قىركۇيەكتەن ماۋسىمدىق تۇماۋعا قارسى ەكپە جاساۋ باستالادى. ول ءۇشىن العاشقى مەديتسينالىق - سانيتارلىق كومەك ۇيىمدارىندا 5 مىڭنان استام پۋنكتى ۇيىمداستىرىلدى. الماتى، نۇر- سۇلتان جانە پاۆلودار قالالارىندا ۆاكتسينا ەگۋ بيىلعى 10-قىركۇيەكتە باستالدى»، - دەدى ۇلتتىق دەنساۋلىق ساقتاۋ ورتالىعىنىڭ قوعامدىق دەنساۋلىقتى نىعايتۋ ورتالىعىنىڭ جەتەكشىسى جازيرا ەمبەرديەۆا ورتالىق كوممۋنيكاتسيالار قىزمەتىندە.

ونىڭ سوزىنە قاراعاندا، كوروناۆيرۋستىق ينفەكتسيا مەن جرۆي ماۋسىمىنا دايىندىق اياسىندا «س ق- فارماتسيا» ءبىرىڭعاي ديستريبيۋتەرى «گريپپول پليۋس» ۆاكتسيناسىنىڭ 2 ميلليوننان استام دوزاسىن ساتىپ الدى. ۆاكتسينادا H 1n1, H 3n2 جانە ۆ تۇماۋ شتامدارىنىڭ انتيگەندەرى بار. بۇل ءوز كەزەگىندە حالىقتىڭ 10 پايىزدان استامىن قامتۋعا مۇمكىندىك بەرەدى. سونىمەن قاتار ج. ەمبەرديەۆا تۇماۋعا قارسى ەكپە جاساۋ ءتارتىبىن ءتۇسىندىردى.

«ءجىتى رەسپيراتورلىق- ۆيرۋستىق ينفەكتسياسىنا توقتالساق، بۇل تۇرعىدا اۋرۋعا شالدىعۋ قاۋپى جوعارى توپ بار. ءبىرىنشى كەزەكتە حالىقتىڭ ءالسىز توبىنا ۆاكتسينا سالىنادى. ولاردىڭ قاتارىنا سوزىلمالى دەرتى بار ءجيى اۋىراتىن 18 جاسقا دەيىنگى بالالار، جۇكتى ايەلدەر (2-3 تريمەستردە) ، 60 تان اسقان قارت ادامدار، سونداي- اق جابىق تيپتەگى مەكەمەلەردەگى ادامدار (بالالار ۇيلەرىندەگى تاربيەلەنۋشىلەر، مەديتسينالىق قىزمەتكەرلەر) كىرەدى. العاشقى مەديتسينالىق- سانيتارلىق كومەك ۇيىمى مەن وڭىرلىك ءتيىستى دەپارتامەنتتەر جىل سايىن ۆاكتسينالاۋ الدىندا دايىندىق جۇمىستارىن جۇرگىزەدى. ولار ادامداردى ەمحاناعا شاقىرتادى»، - دەپ ءتۇسىندىردى جازيرا ەمبەرديەۆا.

ەمحاناعا بارعان كەزدە پاتسيەنتتى ۋچاسكەلىك دارىگەر قاراپ شىعادى. وسى ورايدا دەنساۋلىق جاعدايىنا تۇرعىننىڭ شاعىمدارى سۇرالىپ، دەنە قىزۋى ولشەنەدى. ەگەر دە دانساۋلىعى قالىپتى دەڭگەيدە بولسا، وندا پاتسيەنت تۇماۋعا قارسى ەكپە سالدىرۋعا جىبەرىلەدى. ۆاكتسينا قويىلعاننان كەيىن، پاتسيەنت جارتى ساعات بويى ەمحانادا باقىلاۋدا بولادى. سونىمەن قاتار، ۋچاسكەلىك قىزمەت ەكى كۇننىڭ بارىسىندا بەينە بايلانىس بويىنشا ادامنىڭ جاعدايىن باقىلاپ وتىرادى.

قازاقستاندا تۇماۋ قاشان ءورشيدى

ءبىزدىڭ كليماتتىق بەلدەۋدە كۇز- قىس ايلارىنىڭ كەلۋىنە بايلانىستى وتكىر جۇقپالى اۋرۋلاردىڭ ءورشيتىنى بەلگىلى. ۇلتتىق دەنساۋلىق ساقتاۋ ورتالىعى ينفەكتسيالىق اۋرۋلاردىڭ الدىن الۋ دەپارتامەنتىنىڭ ديرەكتورى جۇمابەك بەكەنوۆتىڭ ايتۋىنشا، جىل سايىن قازاقستاندا 500 مىڭنان 1 ميلليونعا دەيىن ءجىتى رەسپيراتورلىق- ۆيرۋستىق ينفەكتسيا تىكەلەدى. وسى اۋرۋلاردىڭ 64 پايىزىنان جوعارىسىن 14 جاسقا دەيىنگى بالالار قۇرايدى، ياعني ءاربىر اۋىرعان ءۇش ادامنىڭ ەكەۋى بالا دەگەندى بىلدىرەدى. ءجىتى رەسپيراتورلىق- ۆيرۋستىق ينفەكتسيا مەن تۇماۋدىڭ ەپيدەميولوگيالىق ماۋسىمى نەگىزى قازان ايىندا باستالىپ، مامىر ايىنا دەيىن جالعاسادى. بيىلعى ەپيدەميولوگيالىق ماۋسىمعا الاڭداۋشىلىق ءبىلدىرۋىمىز كوروناۆيرۋسقا بايلانىستى. سونىمەن قاتار ول قازاقستاندا تۇماۋدىڭ ءۇش شتامى (H 1n1, H 3n2 جانە ۆ) تارالعانىن، بۇل وتكەن قىستا بەلگىلى بولعانىن جەتكىزدى. ولار زەرتحانالاردا تەكسەرىلىپ، ناقتىلاندى.

«جىل سايىن ۆاكتسينا جاساۋ الدىندا ەلىمىزدە تارالعان ۆيرۋستار شتامدارىن انىقتاۋدىڭ ءمانى زور. ويتكەنى وعان قارسى ەگىلەتىن ۆاكتسينانىڭ سيپاتى ماڭىزدى. وسىعان بايلانىستى ءبىزدىڭ زەرتحانالار جۇمىسى ارقاسىندا بيىل اتالعان ءۇش ءتۇرىن تىركەدىك. كوروناۆيرۋس جاعدايىنا بايلانىستى ءبىز تۇماۋعا قارسى ۆاكتسيناعا اسا ءمان بەرىپ وتىرمىز. سوندىقتان ەكپەنى ۋاقىتىندا الۋدىڭ ماڭىزى زور. سەبەبى بۇل اۋرۋلارعا قارسى انتيدەنە پايدا بولۋىنا كەمىندە ەكى- ءۇش اپتا ۋاقىت كەرەك»، - دەدى ج. بەكەنوۆ.

جۇقپاعا قارسى ەكپەلەر ەلدى مەكەندەردەگى تۇرعىلىقتى جەرىنە جاقىندا ورنالاسقان مەديتسينالىق مەكەمەلەردە (ەمحانالاردا) جاسالادى. جالپى، ءوزىنىڭ قارجىسى ەسەبىنەن ەكپە الامىن دەگەندەرگە اقىلى تۇردە ۇيىمداستىرىلادى. ۆاكتسينانى دايىنداعان ەلىنە بايلانىستى ەكپە باعاسىندا ايىرماشىلىق بولادى.

«ءبىز حالىقتىڭ 10 پايىزىنان استامىن بيۋدجەت ەسەبىنەن قامتاماسىز ەتپەكپىز. بۇل ءوز كەزەگىندە اۋرۋدىڭ تومەندەۋىنە ەلەۋلى اسەر ەتەدى»، - دەدى جۇمابەك بەكەنوۆ.

ايتپاقشى، ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا 15 -قىركۇيەكتە دەنساۋلىق ساقتاۋ مينيسترلىگىنىڭ باسشىلىعى وزدەرىنە تۇماۋعا قارسى ەكپە سالدىراتىنى ايتىلدى.

«ەلىمىزدە تۇماۋعا قارسى ەكپە 15 -قىركۇيەكتەن باستالادى. دەنساۋلىق ساقتاۋ مينيستر الەكسەي سوي ءوزى باستاعان ءبىر توپ مينيسترلىك باسشىلارى نۇر- سۇلتان قالاسىنداعى ەمحانانىڭ بىرىنە بارىپ، ەكپەنى الادى»، - دەدى اتالعان ۆەدومستۆونىڭ رەسمي وكىلى باعدات قوجاحمەتوۆ.