ەرالى توعجانوۆ قاشىقتان وقىتۋدىڭ باستى سەبەبى مەن ماقساتىن ايتتى

بۇل تۋرالى ق ر پرەمەر-ءمينيسترىنىڭ ورىنباسارى ەرالى توعجانوۆ ايتتى، دەپ حابارلايدى قازاقپارات ءتىلشىسى.

«ءسوز جوق، بالالاردىڭ ءبىلىمى وتە ماڭىزدى. دەگەنمەن، ولاردىڭ دەنساۋلىعى باستى نازاردا ءارى باستى ماقسات. بۇل باعىت قازاقستان پرەزيدەنتى قاسىم-جومارت تواقايەۆتىڭ تىكەلەي نازارىندا تۇر. جالپى، قازاقستانداعى ەپيدەميولوگيالىق جاعداي تۇراقتى. بۇگىندە تاۋلىكتىك ءوسىم 0,1 پايىزدى قۇراپ وتىر. بۇگىن COVID-19 جۇقتىرۋدىڭ 86 جاعدايى تىركەلدى. وسى جىلدىڭ 5 شىلدەسىنەن باستاپ ناۋقاستاردى جاتاتىن ورىنمەن قامتاماسىز ەتۋ قاجەتتىلىگى 6 ەسەگە، ك ۆ ي ماسەلەلەرى بويىنشا جەدەل مەديتسينالىق كومەك شاقىرۋلارى 5,5 ەسەگە ازايدى. ناۋقاستاردىڭ 99 پايىزى ساۋىعىپ، امان- ەسەن وتباسىنا ورالدى. بۇل COVID-19-بەن كۇرەسۋدىڭ دۇرىس جولى تاڭدالعانىن جانە ونىڭ ناقتى ناتيجەسىن كورسەتەدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

سونىمەن قاتار ول الەمدەگى COVID-19 جاعدايىنا قاتىستى دەرەكتەرمەن توقتالىپ، دۇنيەجۇزىندە ءقاۋىپ ءالى سەيىلمەگەندىگىن ايتتى.

«كۇن سايىن 250 مىڭنان استام ناۋقاس جانە 5 مىڭنان استام ءولىم-ءجىتىم تىركەلىپ وتىر. يتاليا، فرانسيا، گەرمانيا، اۆستريا، يسپانيا، تۇركيا، ۇلى بريتانيادا سوڭعى ايدا اۋرۋدىڭ ءوسۋى بايقالادى. سونىمەن قاتار وزىمىزبەن كورشىلەس ت م د ەلدەرى اراسىندا دا ماسەلە بار. رەسەيدە بۇگىنگى ءوسىم دەڭگەيى 0,5, وزبەكستاندا 0,9, تاجىكستاندا 0,4 پايىزدى قۇراپ وتىر. ولاردىڭ بارىمەن ءبىز تىعىز قارىم- قاتىناستا وتىرعان مەملەكەتپىز. سوندىقتان مەكتەپتەردىڭ جۇمىسىن، وقۋ پروتسەسىن قاشىقتان وقىتۋ باعىتىنا اۋىستىرۋ تۋرالى شەشىم بالالاردىڭ، سونىمەن قاتار ۇستازداردىڭ دەنساۋلىعىن بارىنشا ساقتاۋ ماقساتىنان تۋىنداپ وتىر»، - دەدى ەرالى توعجانوۆ.

اۆتور: مارلان جيەمباي