دانيار ەلەۋسىنوۆ تيتۋلدىق جەكپە-جەك وتكىزەدى
بۇل تۋرالى Vesti.kz پورتالى حابارلادى.
Matchroom Boxing پروموۋتەرلىك كومپانياسى ناۋرىز ايىندا دانيار ەلەۋسىنوۆ الەمنىڭ بۇرىنعى چەمپيونى دجۋليۋس يندونگومەن (23-2، 12 ك و) 17- ءساۋىر كۇنى وكسون-حيللدە (ا ق ش، مەريلەند شتاتى) جۇدىرىقتاساتىن مالىمدەگەن بولاتىن. الايدا الەمدەگى كوروناۆيرۋس پاندەمياسىنىڭ سالدارىنان جەكپە-جەك بىرنەشە مارتە كەيىنگە شەگەرىلدى.
دانيار ەلەۋسىنوۆتىڭ مەنەدجەرى زيا اليەۆ Vesti.kz پورتالىنا بوكسشىنى قازان ايىنىڭ سوڭىندا شارشى الاڭدا كورىپ قالۋىمىز مۇمكىن ەكەنىن ايتتى. سونداي-اق، دانيار ەلەۋسىنوۆ كاسىپقوي بوكستاعى العاشقى تيتۋلدىق جەكپە-جەگىن وتكىزۋى مۇمكىن. قارسىلاسى رەتىندە دجۋليۋس يندونگو قاراستىرىلىپ جاتىر.
دانياردىڭ قارسىلاسى اتانعان ناميبيالىق بوكسشى - 37 جاستا. ءبىرىنشى جارتىلاي ورتا سالماقتا ءۇش نۇسقا بويىنشا (IBF، IBO جانە WBA (Super)) الەم چەمپيونى بولعان. 2017-جىلدىڭ تامىز ايىندا ابسوليۋتتى الەم چەمپيونى اتاعى جولىندا امەريكالىق تەرەنس كروۋفوردپەن (36-0، 27 ك و) جۇدىرىقتاسىپ، العاش رەت جەڭىلگەن.
2018-جىلدىڭ ناۋرىز ايىندا امەريكالىق رەدجيس پروگرەيستەن ۇتىلعان. ال وتكەن جىلدىڭ تامىزىندا كارلتاۆيۋس دجونسوندى (4-2) جەڭگەن.
دانيار ەلەۋسىنوۆ شارشى الاڭعا وتكەن جىلدىڭ جەلتوقسان ايىندا شىققان. امەريكالىق الان سانچەستى (20-5-1، 10 ك و) تەحنيكالىق نوكاۋتپەن جەڭىپ شىقتى.
