ەلوردادا كوكونىس پەن جەمىستى كۇن ساۋلەسى مەن توپىراقسىز ءوسىرۋ تەحنولوگياسى جاسالۋدا
اكىمدىكتىڭ رەسمي سايتىنىڭ مالىمەتىنشە، س. سەيفۋللين اتىنداعى قازاق اگروتەحنيكا ۋنيۆەرسيتەتىنىڭ عالىمدارى Led system media كومپانياسىنىڭ ءوندىرىس الاڭىندا كوكونىس پەن جەمىستەردى كۇن ساۋلەسىنسىز ءوسىرۋ تەحنولوگياسىن جاساۋدا.
وسىمدىكتەر كۇن ساۋلەسىن نانوفوسفورمەن تولتىرىلعان ارنايى جارىقديودتى شامدارمەن الماستىرادى.
«وسى جوبا بويىنشا ديپلومدىق جۇمىس جازدىق. قازىر ول بويىنشا ماگيسترلىك ديسسەرتاتسيا جازىلۋدا. كوشە شامدارىن شىعاراتىن Led system media كومپانياسى ءوزىنىڭ سيپاتتامالارى بويىنشا كۇن ساۋلەسىنە جاقىن شامداردى سىناقتان وتكىزەدى. ءبىز قازىر كومپانيا جىلىجايىندا وسىمدىكتەر ءۇشىن كۇن ساۋلەسىن وسى شامدارمەن تولىقتاي الماستىرۋ جولىن ىزدەۋدەمىز. ءبىز قازىردىڭ وزىندە ناتيجەگە جاقىنداپ قالدىق»، - دەيدى اۋىل شارۋاشىلىعى عىلىمدارىنىڭ كانديداتى، قازاق اگروتەحنيكا ۋنيۆەرسيتەتىنىڭ اگرونوميا فاكۋلتەتى اۋىل جانە وسىمدىك شارۋاشىلىعى كافەدراسىنىڭ اعا وقىتۋشىسى ارىسگۇل تۇرلىبەكوۆا.
ونىڭ ايتۋىنشا، بۇل ءادىس وسىمدىكتەردى كۇن ساۋلەسى تۇسپەيتىن بولمەدە وسىرۋگە مۇمكىندىك بەرەدى.
سولتۇستىك ايماقتاردا كۇن ساۋلەسىنىڭ تاپشىلىعى اسىرەسە قىستا ايقىن سەزىلەدى. ساۋلە شاشۋ سپەكترى جوعارى بولعاندىقتان، شامدار جەمىستەردىڭ ءوسۋى مەن جەتىلۋىن تەزدەتەدى. ولار ەنەرگيا ۇنەمدەۋ ءۇشىن دە بارىنشا ءتيىمدى. سونىمەن قاتار ەلوردا جىلىجايلارىندا داقىلداردى توپىراقسىز ءوسىرۋ تەحنولوگياسى زەرتتەلىپ جاتىر.
«ولار گيدروپونيكانى پايدالانادى، ياعني كوكونىستەر مەن جەمىستەر تامشىلاتىپ سۋارۋ ادىسىمەن ارنايى سۋبستراتتا وسىرىلەدى. ول ارقىلى وسىمدىكتەر دارۋمەنمەن بايىتىلادى. بۇل ءادىستىڭ ارتىقشىلىقتارى - ارام ءشوپ بولمايدى جانە وسىمدىك اۋرۋلارى از. مۇنداي جىلىجايلاردا ميكروكليمات رەتتەلەدى. بۇل - كوكونىس داقىلدارىن ءوسىرۋدىڭ وتە جوعارى تەحنولوگيالىق تاسىلدەرى»، - دەپ ءتۇسىندىردى ارىسگۇل تۇرلىبەكوۆا.
ونىڭ ايتۋىنشا، وسى ادىسپەن الىنعان جەمىستەردىڭ ساپاسى جەردەگى جىلىجايدا وسىرىلگەندەردەن كەم تۇسپەيدى. الىنعان ءونىمنىڭ حيميالىق قۇرامى تەكسەرىلەدى جانە بارلىق قاجەتتى ستاندارتتارعا سايكەس كەلەدى.
قاتۋ جوبالارىنا اگرونوميا فاكۋلتەتى اۋىل جانە وسىمدىك شارۋاشىلىعى كافەدراسىنىڭ ستۋدەنتتەرى دە قاتىسادى. ولارعا جىلىجايدا كوكونىس پەن جەمىس ءوسىرۋ بويىنشا پراكتيكالىق ساباقتار وتكىزىلەدى. ستۋدەنتتەر جاڭا تەحنولوگيالارمەن تانىسادى. ولارعا مۇنداي ساباق ءۇش جىل بويى وتكىزىلەدى.
