قازاقستاندا العاشقى ونلاين ۇيلەنۋ تويى وتەدى
نۇر-سۇلتان. قازاقپارات - قازاقستاننىڭ «سپارتا» ك ت ك كومانداسىنىڭ كاپيتانى دانيار ءجۇمادىلوۆ «جاسا» اكسياسىنا قوسىلىپ، تىڭ باستاما كوتەردى، دەپ حابارلايدى قازاقپارات ءتىلشىسى.
«مەن دە تىس قالماي، «جاقسىلىق جاسا» اكسياسىنا قاتىسايىن دەپ شەشتىم. جاس جۇبايلار ماحابباتىنىڭ ۇزدىك وقيعاسىنا ارنالعان بايقاۋ جاريالايمىن. جۇلدە - Instagram-نىڭ تىكەلەي ەفيرىندە ونلاين ۇيلەنۋ تويىن وتكىزۋ. وندا بەتاشار، شوۋ-باعدارلاما، شوۋ-بالەت، شاقىرىلعان جۇلدىزدار - ءبارى بولادى»، - دەپ جازدى دانيار ءجۇمادىلوۆ Instagram پاراقشاسىندا.
ونىڭ ايتۋىنشا، قازاقستانداعى ءبىرىنشى Instagram-ۇيلەنۋ تويىنىڭ باستى كەيىپكەرى بولۋ ءۇشىن وتباسىن قۇرۋعا نيەتتى جۇپتار ۆاين، قالجىڭ، ليريكا تۇرىندە وزدەرىنىڭ ماحاببات تاريحىنا قاتىستى قىسقا ۆيدەو ءتۇسىرىپ جىبەرۋى ءتيىس.
«تىكەلەي ەفير بارىسىندا بارلىق جۇپتىڭ ىشىنەن جەڭىمپازدى ۇلىم ءالي توسىن تۇردە تاڭداپ الادى. ال ءبىز كەرەمەت ونلاين- ۇيلەنۋ تويىن وتكىزىپ بەرەمىز. ءوز اتىمنان دا سىيلىق جاسايمىن. ۆيدەوعا #instaسۆادبا #جاسا #دەيستۆۋي حەشتەگىن قويىڭىزدار. 10 كۇننەن كەيىن تىكەلەي ەفيردە قورىتىندىسىن شىعارامىن. بارلىقتارىڭىزعا ساتتىلىك، تابىس تىلەيمىن. جاقسىلىق جاساڭىزدار!»، - دەدى ول.
