ماسكەۋدە ەرىكتىلەرگە كوروناۆيرۋسقا قارسى ۆاكتسينا ەگۋ باستالدى

بۇل تۋرالى سارسەنبىدە جۋرناليستەرگە ماسكەۋ قالاسى اكىمىنىڭ الەۋمەتتىك دامۋ ماسەلەلەرى جونىندەگى ورىنباسارى اناستاسيا راكوۆا ايتتى، دەپ حابارلايدى قازاقپارات ت ا س س اگەنتتىگىنە سىلتەمە جاساپ.

راكوۆا ۆاكتسينالاۋدى باستاۋ بۇكىل رەسەي ءۇشىن ماڭىزدى ەكەنىن ايتتى. ۆاكتسينا ەكى كەزەڭمەن جۇزەگە اسىرىلادى: ۆاكتسينانىڭ ءبىرىنشى كومپونەنتى بىردەن، ەكىنشىسى - 21 كۇننەن كەيىن سالىنادى. كومپونەنتتەر قۇرامىندا يممۋنيتەتتى كوتەرەتىن بەلسەندى زاتتارىنىڭ بولۋىمەن ەرەكشەلەنەدى. ۆاكتسينالاۋ تەگىن جۇرگىزىلەدى. راكوۆا ءوتىنىم بەرۋشىلەردىڭ سانى كۇن سايىن ارتىپ كەلە جاتقانىن اتاپ ءوتتى. قازىردىڭ وزىندە 35 مىڭنان استام ماسكەۋلىك ۆاكتسينا سالدىرتۋعا ءوتىنىم بەرگەن.

قازىر ماسكەۋدە كوروناۆيرۋسقا قارسى ۆاكتسينانى زەرتتەۋ التى مەديتسينالىق مەكەمەنىڭ بازاسىندا جۇرگىزىلۋدە. الداعى ۋاقىتتا ولاردىڭ سانى 20 بولماق. راكوۆانىڭ ايتۋىنشا، ۆاكتسينانى 18 جاستان اسقان، ۆاكتسينالاۋعا دەيىن ەكى اپتا اۋىرماعان، جرۆي- مەن اۋىرماعان، COVID-19 جۇقتىرماعان جانە زەرتتەۋگە دەيىن كەمىندە ەكى اپتا بۇرىن كوروناۆيرۋس جۇقتىرعان ناۋقاستارمەن بايلانىستا بولماعان، ماسكەۋ ممس ءپوليسى بار رەسەي ازاماتى قاتىسا الادى. دۇيسەنبى كۇنى ماسكەۋدە كوروناۆيرۋسقا قارسى ۆاكتسينانى زەرتتەۋگە قاتىسۋعا ءوتىنىش بەرگەن العاشقى ەرىكتىلەر مەديتسينالىق تەكسەرۋدەن وتە باستادى. تەكسەرۋ قورىتىندىلارى مەن تالداما ناتيجەلەرى بويىنشا دارىگەرلەر ۆاكتسينالاۋعا كەلەتىن ادامداردى ىرىكتەيدى. مەديتسينالىق قىزمەتكەرلەر ەرىكتىلەرمەن تەلەفون ارقىلى، ارنايى ءموبيلدى قوسىمشا ارقىلى نەمەسە تەلەمەديتسينالىق تەحنولوگيالار ارقىلى ۇنەمى بايلانىستا بولادى. ءوزىن جايسىز سەزىنگەن جاعدايدا، ەرىكتى بۇل تۋرالى دارىگەرگە حابارلاي الادى.