قازاقستاندىق جىگىت قىتايداعى مانساپ، حالىق ءداستۇرى جايلى

نۇر -سۇلتان. قازاقپارات - قىتايعا بىرنەشە جىل بۇرىن مانساپ قۋىپ كەتكەن جەرلەسىمىز دامير قادىروۆ كورشى ەل ۇلكەن مۇمكىندىكتەرگە جول اشقانىن ايتادى.

قىتاي سياقتى الپاۋىت ەلگە اۋەلدە كوشۋگە دايىن بولماعان دانيار ۋاقىت وتە كەلە جەرگىلىكتى ءداستۇر-مادەنيەتىنە ۇيرەنگەن. اسپان استى ەلىندەگى ءومىرى مەن قىزمەتى تۋرالى وتانداسىمىز Stan.kz رەداكتسياسىنا بەرگەن سۇحباتىندا ايتتى.

قىتاي ۇلكەن مۇمكىندىكتەرگە جول اشتى

قازىرگى ۋاقىتتا ACE Ingredients كومپانياسىندا بيوتەحنولوگيا سالاسىندا حالىقارالىق ساتىلىمدار بويىنشا مەنەدجەر بولىپ جۇمىس ىستەيمىن. ءبىز تاماق ونەركاسىبىنە ارنالعان ينگرەديەنتتەردى وندىرەمىز جانە شەتەلگە جەتكىزەمىز. كومپانيا - وتە زاماناۋي، ۇجىمىم - حالىقارالىق جانە كوپ ءتىلدى. جەرگىلىكتى قىتايلىقتاردان باسقا يتاليا، ماروككو، مەكسيكا، رەسەي ەلىنەن كەلگەندەر بار.

ەۇۋ- دە باكالاۆردىڭ 4-كۋرسىندا وقىپ جۇرگەندە مەن ماگيستراتۋرانى شەتەلدە وقۋ تۋرالى ويلادىم. سول كەزدە ءبىزدىڭ كافەدرادا Chemical Engineering سالاسىنداعى قىتايدىڭ ۇزدىك ۋنيۆەرسيتەتتەرىنىڭ بىرىنە تۇسۋگە بايقاۋ جاريالاندى. مەن ۇزاق ويلانباستان قۇجات تاپسىردىم. ال قىتاي ءوز كەزەگىندە قىتاي ۇكىمەتىنىڭ (CSC) تولىق گرانتىن بەرە وتىرىپ، ۇلكەن مۇمكىندىككە جول اشتى.

شابادانىمدى جيناپ، كەلە سالدىم

شىنىمدى ايتسام، قىتاي سياقتى ەرەكشە ەلگە كوشۋگە دايىن ەمەس ەدىم. ءجاي عانا چەمودانىمدى جيناپ، كەلە سالدىم. شانحاي اۋەجايىنان ءدال 6 جىل بۇرىن تۇسكەندەگى سەزىمىم ءالى ەسىمدە. تۇنشىعىپ قالاتىنداي كورىندى، ويتكەنى كوشەدە تىنىس الاتىن اۋا جوق، ىستىق اۋا مەن ىلعال ارالاسىپ تۇردى. ءبىراق بۇل ماۋسىمدىق قۇبىلىس ەكەنىن كەيىن ءبىلدىم.

مۇندا كەلىپ، قىتايدىڭ تەحنيكالىق جانە ەكونوميكالىق تۇرعىدان قانشالىقتى العا جىلجىعانىن ءتۇسىندىم، ءبىراق كەيدە كەيبىر مادەني- ەتيكالىق ماسەلەلەردە ارتتا قالعانىن كورە الاسىز. تۇسىنىكتى بولۋ ءۇشىن مىسال كەلتىرەيىن: ءسىز سالقىن اۋەجايدان ءتۇستىڭىز، قالا ورتالىعىنا وتە ىڭعايلى جانە زاماناۋي مەترومەن جەتتىڭىز، ال كوشەگە شىققاندا قوعامدىق ورىنداردا تۇكىرىپ جۇرگەن ادامداردى نەمەسە تاكسي جۇرگىزۋشىسى جولدىڭ جيەگىندە دارەت سىندىرىپ تۇرعانىن كورە الاسىز (سيرەك، ءبىراق بولادى).

ءجونى دۇرىس تاعام ىزدەۋمەن قيىندىقتار بولدى، ويتكەنى قىتايدا ءبىز ءۇشىن تىم اشى جانە تۇسىنىكسىز تاماق كوپ. مىسالى، جەرگىلىكتى تۇرعىندار جاقسى كورەتىن «ساسىق توفۋ». شىندىعىندا قىتاي اسحاناسىندا ءارتۇرلى جانە ءدامدى تاعامدار كوپ ەكەن، بالكىم، مەن ۇيرەنىپ كەتكەندىكتەن سولاي كورىنەتىن شىعار.

شانحايدا ماعان ۇنايتىن نارسە:

1) قاۋىپسىزدىك (ۇرلىق پەن بانديتيزم جوق)

2) ىڭعايلى جاعداي (كولىك، ينفراقۇرىلىم، كوممۋنيكاتسيا)

3) دامۋ مەن ءوسۋ ءۇشىن مۇمكىندىكتەر ۇشان- تەڭىز.

ۆيرۋستان كەيىنگى قىتاي

كوروناۆيريۋس كەزىندە نە بولىپ جاتقانى الدىمەن تۇسىنىكسىز ەدى، سودان كەيىن قورقىنىش تۋىندادى، كەيىن تىنىشتىق ورنادى. قىتاي بيلىگى قانشالىقتى ءتيىمدى جۇمىس ىستەيتىنىن كورگەندە كوڭىلىم ورنىنا ءتۇستى. ماسكالار مەن ءدارى-دارمەكتەردىڭ باعاسى باقىلاۋدا بولدى. بارلىق جەردە ساقتىق شارالارى مەن كارانتين ەرەجەلەرى ساقتالدى. قازىر، مەنىڭ ويىمشا، كەيبىر قىزمەت سالالارىن قوسپاعاندا قىتاي قالپىنا كەلدى. ارينە، بارلىعى دا ءالى دە ماسكا تاعادى.

اعىلشىن ءتىلى مۇعالىمدەرىنىڭ تابىسى 2-3 ەسە جوعارى

ماگيستراتۋرانى بىتىرگەن سوڭ نارىقتاعى جالاقى كەمىندە 1000 دوللار. سالىستىرمالى تۇردە اعىلشىن ءتىلى مۇعالىمدەرى 2-3 ەسە جوعارى جالاقى الادى، سوندىقتان ءبىزدىڭ كوپتەگەن ستۋدەنت وقىتۋشى رەتىندە جۇمىس ىستەيدى.

شىنىن ايتقاندا، مۇندا جۇمىس ىستەپ جۇرگەن قازاقستاندىقتار كوپ ەمەس. قازاقستاندىقتار نەگىزىنەن ساۋدا جانە بيزنەس ءۇشىن قىتايعا كەلەدى. ەگەر ماكسيمالدى تابىس تۋرالى ايتاتىن بولساق، بۇل جەكە ادامنىڭ وزىنە بايلانىستى.

ءتىلدى ۇيرەنۋدە كوپتەگەن قيىندىق بولدى. قىتاي تىلىندە الفاۆيت جوق، 5 تون، بىردەي بۋىندار ايتىلۋى كەزىندە ءارتۇرلى ماعىناعا يە بولادى، سونداي-اق مىڭداعان ەروگليف بار. ءتىلدى تاباندىلىق، ىجداھاتتىلىق جانە تاجىريبە ارقىلى مەڭگەرە الاسىز.

قىتايلىق قالىڭدىقتار اق كويلەكتىڭ ورنىنا قىزىل كويلەك كيەدى

مادەنيەتى مەن وركەنيەتى مۇلدەم باسقا بولعانىمەن، قىتايلىقتاردىڭ بىزگە ۇقساس ءداستۇرى سان الۋان. مىسالى، ولاردىڭ ۇيلەنۋ تويى بىزگە ۇقساس. ءداستۇر بويىنشا، ەرلەر جاعى قالىڭدىق ءۇشىن تولەم دايىندايدى، تويدى ەكى جاق تا جاسايدى، كوپ ادام شاقىرىلادى، شىعىن اتا- انا موينىنا تۇسەدى. بىزدەن ايىرماشىلىعى - قىتايلىق قالىڭدىقتار اق كويلەكتىڭ ورنىنا قىزىل كويلەك كيەدى.

قىتايداعى وتانداستارىمىزبەن جاقسى ارالاسامىن. ۋنيۆەرسيتەت كەزىندە ءبىز قىتايداعى قازاقستاندىق ستۋدەنتتەر قاۋىمداستىعى (KSAC) ۇيىمداستىرعان ءىس- شارالارعا قاتىستىق. سونىمەن قاتار، ءبىز بالالارمەن بىرگە فۋتبول وينايمىز. الدەبىر تۋىنداعان جاعدايدا، ءبىزدىڭ بارلىق جەرگىلىكتى قازاقستاندىقتار ءبىر- بىرىنە كومەككە كەلۋگە دايىن.

پوستكەڭەستىك ەلدەردىڭ قىزىقتى تۇلعالارىمەن سۇحباتتاسامىن

قازىرگى ۋاقىتتا مەنىڭ يندۋستريامدا حالىقارالىق بيزنەستى دامىتۋ سالاسىندا كاسىبي ءوسۋدى جوسپارلاپ وتىرمىن. ال بۇعان قوسا، بوس ۋاقىتىمدا مەن قىتايدا بەلگىلى ءبىر جەتىستىكتەرگە جەتكەن پوستكەڭەستىك ەلدەردىڭ قىزىقتى تۇلعالارىمەن سۇحباتتاسامىن.

YouTube پلاتفورماسىندا «سكاجي ميرۋ دا» دەپ اتالاتىن جوبام بار، سونى ءارى قاراي دامىتۋدى كوزدەپ وتىرمىن.

قازاقستانعا ورالۋ جايلى ءجيى ويلانامىن. شىن مانىندە، مەن ءوز ەلىمدى وتە جاقسى كورەمىن جانە قايتا ورالعىم كەلەدى. ءبىراق كوپ نارسەنى ۇيرەنگىم كەلەدى، ءوز ءىسىنىڭ بىلىكتى مامانى جانە جاقسى كوشباسشىسى بولعىم كەلەدى. تەك سوندا وتانىما ورالعاندا ەل يگىلىگى ءۇشىن ءوزىمنىڭ تاجىريبەممەن بولىسە الامىن.