رەسەيدە كوروناۆيرۋسقا قارسى ۆاكتسينانىڭ العاشقى پارتياسى اينالىمعا شىقتى
ماسكەۋ. تاسس - قازاقپارات - كوروناۆيرۋسقا قارسى «سپۋتنيك V» ۆاكتسيناسىنىڭ العاشقى پارتياسى ازاماتتىق اينالىمعا شىعارىلدى.
دەنساۋلىق ساقتاۋ مينيسترلىگى باسپا ءسوز قىزمەتىنىڭ ايتۋىنشا، ءدارى-دارمەكتى جاقىن ارادا رەسەي وڭىرلەرىنە جەتكىزۋ كوزدەلىپ وتىر، دەپ حابارلايدى قازاقپارات رەسەيلىك تاسس اگەنتتىگىنە سىلتەمە جاساپ.
«جاڭا كوروناۆيرۋستىق ينفەكتسيانىڭ الدىن الۋعا ارنالعان ۆاكتسينانىڭ العاشقى پارتياسى - «گام-كوۆيد-ۆاك» (سپۋتنيك V) قاجەتتى ساپا سىناقتارىنان ءوتىپ، ازاماتتىق اينالىمعا شىعارىلدى»، - دەلىنگەن حابارلامادا.
سىناقتار رەسەيدىڭ دەنساۋلىق ساقتاۋدى قاداعالاۋ قىزمەتىنىڭ زەرتحانالارىندا جۇرگىزىلگەن.
ۆاكتسينانى گامالەيا اتىنداعى ۇلتتىق ەپيدەميولوگيا جانە ميكروبيولوگيا عىلىمي-زەرتتەۋ ورتالىعى جاساعان.
بۇعان دەيىن دەنساۋلىق ساقتاۋ مينيسترلىگىنىڭ باسشىسى ميحايل مۋراشكو: «بۇل كەزەڭدەگى ازاماتتىق اينالىم - تاۋەكەل توبىنداعى تۇرعىنداردى، اتاپ ايتقاندا، مۇعالىمدەر مەن دارىگەرلەردى ۆاكتسينالاۋ. ول تىركەۋدەن كەيىنگى كلينيكالىق زەرتتەۋلەرمەن قاتار جۇرگىزىلەدى»، - دەپ تۇسىندىرگەن بولاتىن.
