ۇلتتار ليگاسى: قازاقستان قۇراماسى بەلارۋستەن ەسە قايتارا الا ما؟
ەستەرىڭىزگە سالا كەتەلىك، قازاقستان C ليگاسىنىڭ ءتورتىنشى توبىندا سىنعا تۇسەدى. قارسىلاستارى - البانيا، بەلارۋس جانە ليتۆا قۇرامالارى. قازاقستاندىق قۇراما 4 - قىركۇيەكتە سىرت الاڭدا ليتۆانى 2:0 ەسەبىمەن جەڭىپ قايتتى.
وسىلايشا دوپ دوداسىن ءساتتى باستادى. ال بەلارۋس ءوز الاڭىندا البانياعا 0:2 ەسەبىمەن ەسە جىبەردى. تۋرنير كەستەسىندە قازاقستاندىق فۋتبولشىلار البانيا قۇراماسى ەكەۋى العاشقى ەكى ورىندى ءوزارا ءبولىسىپ تۇر.
بۇگىنگى قارسىلاس - بەلارۋس قۇراماسى قازاقستاندىق جانكۇيەرلەرگە جاقسى تانىس. ەكى قۇراما بۇعان دەيىن ءۇش مارتە جاسىل الاڭدا كەزدەسكەن. العاشقىدا ولاردىڭ جولى 2010-جىلعى ەۋروپا چەمپيوناتىنا ىرىكتەۋ ساتىسىندا ءتۇيىستى. 2009-جىلدىڭ 1 - ساۋىرىندە الماتىدا وتكەن ويىندا قازاقستاندىق قۇراما اتالعان قارسىلاسىنا 1:5 ەسەبىمەن جول بەردى. ال سول جىلدىڭ 10 - قازانىندا بەلارۋستىڭ برەست قالاسىنداعى كەزدەسۋدە الاڭ يەلەرى قازاقستان قۇراماسىنان 4:0 ەسەبىمەن باسىم ءتۇستى. بەلارۋس فۋتبول فەدەراتسياسى 1989-جىلى قۇرىلعان.
1992-جىلى FIFA مۇشەلىگىنە قابىلدانسا، 1993-جىلدان باستاپ UEFA قۇرامىندا باق سىناپ كەلەدى. سودان بەرگى ۋاقىتتا اتالعان قۇراما جوعارى جەتىستىگىمەن كوزگە تۇسە قويعان جوق.
ەۋروپا قۇرلىعىنداعى ورتانقول قۇراما قاتارىندا سانالادى. ۇلتتار ليگاسىنىڭ 2018/2019-جىلعى ماۋسىمىندا D ليگاسىنىڭ ەكىنشى توبىندا ليۋكسەمبۋرگ، مولداۆيا جانە سان- مارينومەن سىنعا تۇسكەن بەلارۋستىك فۋتبولشىلار ءبىرىنشى ورىنعا يە بولدى.
بەلارۋس قۇراماسىندا نەگىزىنەن جەرگىلىكتى چەمپيوناتتا ويىن كورسەتەتىن فۋتبولشىلار سانى باسىم. سونداي-اق، قۇرامدا رەسەيدىڭ «كراسنودارىنىڭ» نامىسىن قورعاپ جۇرگەن الەكساندر مارتىنوۆيچ، «ۋرال» كلۋبىندا دوپ تەبەتىن نيكولاي زولوتوۆ، تۋلانىڭ «ارسەنالىنىڭ» ويىنشىسى يۋري كوۆاليەۆ، «لوكوموتيۆ» شابۋىلشىسى ۆيتالي ليساكوۆيچ بار. سونداي-اق، قازاقستاندىق كلۋبتاردا دوپ تەبەتىن نيكيتا ناۋموۆ («جەتىسۋ») پەن ماكس ەبونگ («استانا») بار. قازاقستان مەن بەلارۋس قۇرامالارى اراسىنداعى كەزدەسۋ الماتى قالاسىندا 7 - قىركۇيەكتە ەلوردا ۋاقىتىمەن 20.00 دە باستالادى. ويىن Qazsport تەلەارناسىندا تىكەلەي ەفيردە كورسەتىلەدى.
