امىرە قاشاۋبايەۆ اتىنداعى ءان بايقاۋىنىڭ جەڭىمپازى انىقتالدى

حاكىم ابايدىڭ 175 جىلدىق مەرەيتويى اياسىندا ۇيىمداستىرىلعان شارا امىرە قاشاۋبايەۆ اتىنداعى مەملەكەتتىك فيلارمونياسىنىڭ 75 جىلدىعىنا ارنالعان.

- ش ق و مادەنيەت، ارحيۆتەر جانە قۇجاتتاما باسقارماسىنىڭ قولداۋىمەن 2020-جىلدىڭ 1 مەن 5- قىركۇيەك كۇندەرى ارالىعىنا ونلاين فورماتتا وتكەن بايقاۋدا نۇر-سۇلتان، الماتى، شىمكەنت، اتىراۋ، جامبىل، قاراعاندى، و ق و، ش ق و جانە س ق و وڭىرلەرىنىڭ انشىلەرى باق سىنادى.

وسى دودادا جاس ءانشىمىز سليامعالي داۋرەنبەك كوپشىلىكتى ءوز ونەرىمەن ءتانتى ەتىپ، باس جۇلدەنى جەڭىپ الدى.

ول ق ر مادەنيەت سالاسىنىڭ ۇزدىگى امەنگەلدى قوجانوۆتان ءبىلىم العان، - دەيدى وبلىستىق فيلارمونيانىڭ باس رەداكتورى ساۋلە مۇقايەۆا.

سليامعالي داۋرەنبەك 1996-جىلى پاۆلودار وبلىسى تەرەڭكول اۋدانىنىڭ قىزىلتاڭ اۋىلىندا دۇنيەگە كەلگەن. 2012-2016-جىلى دارىندى بالالارعا ارنالعان مۋزىكالىق كوللەدج، مۋزىكالىق مەكتەپ- ينتەرناتىندا ءداستۇرلى ءان ورىنداۋ ماماندىعى بويىنشا وقىدى.

2014-جىلى وبلىستىق ءداستۇرلى ءان ورىنداۋشىلارى اراسىندا وتكەن بايقاۋدىڭ باس جۇلدەگەرى. 2014-جىلى قاراعاندى وبلىسىندا ءداستۇرلى انشىلەر بايقاۋىندا وتكەن 1- حالىقارالىق «تۇلعا» بايقاۋىندا گران-پري يەگەرى.

2016-2020-جىلدارى قۇرمانعازى اتىنداعى قازاق ۇلتتىق كونسەرۆاتورياسىندا «ءداستۇرلى مۋزىكا ونەرى» ماماندىعى بويىنشا ۇستازى ق ر ەڭبەك سىڭىرگەن قايراتكەرى شۇكىمانوۆ ەركىن تۇرسىنعالي ۇلىنان ءبىلىم العان.

2017-جىلى تۇرسىنعازى راحيموۆ اتىنداعى رەسپۋبليكالىق كونكۋرستىڭ جانە 2019-جىلى ءمادي ءباپي ۇلى اتىنداعى رەسپۋبليكالىق كونكۋرستىڭ لاۋرەاتى.