ۇلتتار ليگاسى: قازاقستان قۇراماسى ليتۆادان باسىم ءتۇستى
ەستەرىڭىزگە سالا كەتەلىك، قازاقستاندىق قۇراما س ليگاسىنىڭ ءتورتىنشى توبىندا وينايدى. قارسىلاستارى - البانيا، بەلارۋس جانە ليتۆا قۇرامالارى. ليتۆا قۇراماسى ساپىنداعى فۋتبولشىلاردىڭ باسىم بولىگى ءوز ەلىنىڭ چەمپيوناتىندا وينايدى. سونداي- اق، بولگاريا، يزرايل، يتاليا، لاتۆيا، پولشا، سەربيا، ەستونيا، حورۆاتيا چەمپيوناتتارىندا باق سىناپ جۇرگەن فۋتبولشىلار بار. ال ءۇش فۋتبولشى قازاقستان پرەمەر- ليگاسىندا ويىن كورسەتەدى.
اتاپ ايتقاندا، پەتروپاۆلدىڭ «قىزىلجارىندا» ۆيتاۋتاس اندريۋشكياۆيچيۋس، تالدىقورعاننىڭ «جەتىسۋىندا» ارتۋراس جۋلپا، جامبىل وبلىسىنىڭ «تارازىندا» وۆيديۋس ۆەربيتسكاس بار. كەزدەسۋ قازاقستان قۇراماسى ءۇشىن ءساتتى باستالدى دەۋگە بولادى. العاشقى مينۋتتاردا ولار الدىڭعى شەپتە ءجيى بوي كورسەتتى. وسىنداي ساتتەردىڭ بىرىندە قارسىلاستار قاقپاسىنان ساڭىلاۋ تاپتى. باكتييور زاينۋتدينوۆ 3-مينۋتتا گول سوعىپ كەتتى.
ەكىنشى كەزەڭدە قازاقستاندىق قۇراما نەگىزىنەن قورعانىسقا كوبىرەك كوڭىل ءبولدى. الاڭ يەلەرى گول سوعاتىن مۇمكىندىكتەردى ىزدەدى. دەگەنمەن ولار 86-مينۋتتا وزدەرىنىڭ قاقپاسىنا تاعى ءبىر گول جىبەرىپ الدى. ونى قازاقستاندىق جارتىلاي قورعاۋشى يسلامبەك قۋات ءوزىنىڭ ەنشىسىنە جازدى.
وسىلايشا قازاقستان قۇراماسى قارسىلاسىنان 2:0 ەسەبىمەن باسىم ءتۇستى. ەكى قۇراما بۇعان دەيىن ءبىر مارتە عانا كەزدەستى. 2014 -جىلدىڭ 5 - ناۋرىزىندا تۇركيانىڭ انتاليا قالاسىندا وتكەن جولداستىق كەزدەسۋدە ەكەۋى 1:1 ەسەبىنە قاناعات ءبىلدىرىپ تارقاستى. سول سەبەپتى بۇگىنگى ويىن تۇڭعىش رەسمي كەزدەسۋ سانالادى. بۇگىن ءتورتىنشى توپتا تاعى ءبىر ويىن وتكىزەدى. بەلارۋس قۇراماسى ءوز الاڭىندا البانيانى قابىلدايدى.
