جەتەلى جۇرت جەتى ۇرپاعىن ويلايدى
وندا پرەزيدەنت ەكستراكورپورالدى ۇرىقتاندىرۋ (ە ك ۇ) باعدارلامالارى بويىنشا بولىنەتىن كۆوتانىڭ سانىن 7 مىڭعا دەيىن، ياعني 7 ەسە كوبەيتۋ قاجەتتىگىن قاداپ ايتتى.
بۇل - ۇلكەن قۋانىش. ويتكەنى ەكۇ ادىسىنە جۇگىنۋ حالىقتىڭ باسىم بولىگىنە قولجەتىمسىز بولىپ وتىرعانى راس. بۇگىنگە دەيىن ءسابي سۇيگىسى كەلەتىن وتباسىلار 4-5 جىل كەزەك كۇتىپ، ارەڭ قول جەتكىزەتىن. سوندىقتان كۆوتانى بىردەن 7 ەسەگە ۇلعايتۋ - حالىق ءۇشىن ۇلكەن مۇمكىندىك، زور جەتىستىك.
باعدارلامانى جۇزەگە اسىرۋداعى ءبىرىنشى مىندەت - مەملەكەت اقشاسىن جەلگە شاشپاۋ. نەگىزى ءاربىر كۆوتاعا مەملەكەت تاراپىنان 1 ميلليون تەڭگەدەي اقشا بولىنەدى. ونىڭ ءبارى تەحنولوگياعا كەتپەيدى. تەڭ جارتىسى ءدارى- دارمەككە جۇمسالادى. ال وعان ناتيجەلى توپتار عانا تاڭدالىپ الىنادى. ولار - انالىق ۇرىعى بار ايەل مەن اتالىق ۇرىعى بار ەر ادام. ياعني ءبىز مامان رەتىندە الدىن الا بولجام جاساپ، قاي وتباسىنىڭ قانداي مۇمكىندىگى بار ەكەنىن زەرتتەپ، كوز جەتكىزگەن سوڭ عانا كۆوتا بولىنەتىندەر قاتارىنا قوسامىز.
ال كەرىسىنشە جاعدايدا مەملەكەت تاراپىنان بولىنەتىن اقشانى جەلگە شاشقانداي بولارىمىز انىق. دەگەنمەن ناتيجەلىلىگى تومەن توپتارعا الەۋمەتتىك مەديتسينالىق ساقتاندىرۋ جۇيەسى ارقىلى كومەكتەسۋگە بولادى. وعان ءار ادام جارنا تولەيدى. دەمەك، وسى جۇيە ارقىلى جىلىنا ءبىر رەت ەكۇ قىزمەتىن الۋعا مۇمكىندىك جاسالۋى كەرەك. ءسىز سالىمشى رەتىندە قورعا سالعان اقشاڭىزدى پايدالانۋعا قۇقىڭىز بار. مىنە، ءسىز ناتيجەلى توپقا جاتاسىز با، جوق پا، بىردەن- ءبىر جولى وسى دەپ ەسەپتەيمىن.
ەلىمىزدە قانشا بەدەۋ ايەل مەن بەلسىز ەر ادامنىڭ بار ەكەنى جايلى ناقتى ستاتيستيكا جوق. ءبىز نەگىزىنەن دۇنيەجۇزىلىك جالپى ستاتيستيكاعا سۇيەنىپ ايتامىز. سول تۇرعىدان كەلگەندە، ءقازىر قازاقستاندا جاڭادان شاڭىراق كوتەرگەندەردىڭ 5-20 پايىزى بەدەۋلىكپەن بەتپە-بەت كەلەدى. شامامەن ءاربىر بەسىنشى نە التىنشى وتباسى پەرزەنتكە زار بولىپ ءجۇر.
اتالعان باعدارلامانى ويداعىداي جۇزەگە اسىرۋدا ەڭ الدىمەن، ناقتى ستاتيستيكاعا قول جەتكىزۋىمىز كەرەك. ول ءۇشىن بەدەۋلىكتىڭ رەگيسترىن، ياعني تىركەۋىن جاساۋىمىز ءتيىس. سوندا عانا ولاردىڭ كەمىندە %60-70 ى وسى مەملەكەت ەسەلەپ بولگەلى وتىرعان كۆوتانىڭ ارقاسىندا بەسىك تەربەتۋ باقىتىنا يە بولادى.
ەكىنشىدەن، كۆوتا ءادىل ءبولىنۋى ءۇشىن ءار ايەل ءوز كەزەگىن اشىق تۇردە باقىلاي الۋى ءتيىس. جاسىراتىنى جوق، تانىستار ارقىلى، باسقالاي دا جولدارمەن كۆوتا العانىن اشىپ ايتاتىندار بارشىلىق. پروتسەسس تۇگەل ەلەكتروندى تۇردە ءجۇرىپ، كەزەككە تۇرعان ايەلدەر كەزەگىنىڭ قالاي جىلجىپ جاتقانىن كورىپ وتىراتىنداي مۇمكىندىك بولعانى دۇرىس.
مىنە، سوندا عانا پرەزيدەنتىمىزدىڭ جولداۋىندا ايتىلعان تاپسىرما ءادىل ورىندالار ەدى. جالپى، مامان رەتىندە ايتارىم، اتالعان باعدارلاما - مەملەكەتىمىزدىڭ دەموگرافيالىق حال-احۋالىن كوتەرۋدىڭ ماڭىزدى مۇمكىندىگى.
سالتانات بايقوشقاروۆا، پرەزيدەنت جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى، «ەكومەد» كلينيكالار جەلىسىنىڭ عىلىمي ديرەكتورى
egemen.kz