لۋكاشەنكو كۇشتىك قۇرىلىم باسشىلارىن نەگە اۋىستىردى؟
نۇر-سۇلتان. قازاقپارات - بەلارۋس پرەزيدەنتى الەكساندر لۋكاشەنكو مەملەكەتتىك قاۋىپسىزدىك كوميتەتىنىڭ ءتوراعاسى ۆالەري ۆاكۋلچيكتى قاۋىپسىزدىك كەڭەسىنىڭ حاتشىسى ەتىپ تاعايىندادى.
بۇعان دەيىن كەڭەسكە جەتەكشىلىك ەتكەن اندرەي راۆكوۆ قىزمەتىنەن بوساعان. بۇل تۋرالى بەلارۋس پرەزيدەنتىنىڭ باسپا ءسوز قىزمەتى حابارلادى.
مەملەكەتتىك قاۋىپسىزدىك كوميتەتىنىڭ ءتوراعاسى بولىپ يۆان تەرتەل تاعايىندالعان. ول بۇعان دەيىن مەملەكەتتىك باقىلاۋ كوميتەتىن باسقارعان.
اندرەي راۆكوۆقا جاڭا قىزمەت بەرىلگەنى-بەرىلمەگەنى بەلگىسىز.
تامىز ايىندا وتكەن پرەزيدەنت سايلاۋىنىڭ رەسمي قورىتىندىسىن وپپوزيتسيا مويىنداماعاننان كەيىن ەلدە ساياسي داعدارىس تۋىنداعان ەدى. وپپوزيتسيا پرەزيدەنتتىڭ وتستاۆكاعا كەتۋىن جانە جاڭادان ءادىل سايلاۋ وتكىزۋدى تالاپ ەتىپ وتىر. لۋكاشەنكو بيلىكتەن كەتپەيتىنىن مالىمدەگەن.
ەلدىڭ ءىرى قالالارىندا نارازىلىق شارالارى تۇراقتى تۇردە ءوتىپ جاتىر. بۇعان دەيىن مينسك ورتالىعىندا وتكەن نارازىلىق شاراسىنا 200 مىڭعا دەيىن ادام قاتىسقان.
گەنەرال- لەيتەنانت ۆاكۋلچيك مەملەكەتتىك قاۋىپسىزدىك كوميتەتىن سەگىز جىل باسقارعان. گەنەرال-لەيتەنانت راۆكوۆ قاۋىپسىزدىك كەڭەسىنە قاڭتار ايىنان بەرى جەتەكشىلىك ەتكەن. وعان دەيىن التى جىل قورعانىس ءمينيسترى بولعان.
