ق ح ل: «بارىس» العاشقى ويىندا جەڭىسكە جەتتى

نۇر- سۇلتان. قازاقپارات - بۇگىن ەلوردالىق «بارىس» قۇرلىقتىق حوككەي ليگاسى جاڭا ماۋسىمىنداعى العاشقى ويىنىن لاتۆيادا جەرگىلىكتى «دينامو» (ريگا) كومانداسىنا قارسى وتكىزدى، دەپ حابارلايدى قازاقپارات ءتىلشىسى.

بۇگىنگى ويىندى قازاقستاندىق حوككەيشىلەر وتە ءساتتى باستادى. ءبىرىنشى كەزەڭنىڭ 8-مينۋتىندا ەلوردالىق كلۋب ساپىنان كەرتيس ۆالك ەسەپ اشىپ كەتتى. ال 13-مينۋتتا «بارىستىڭ» تاعى ءبىر حوككەيشىسى نيكيتا ميحايليس ەسەپتى ۇستەمەلەي ءتۇستى. ويىننىڭ 17-مينۋتىندا داررەن ديتس ۇپاي سانىن 3:0 گە جەتكىزدى. ەكىنشى كەزەڭدە ايدىن يەلەرى گول سوعۋعا العا ۇمتىلدى. دەسە دە ولار «بارىستىڭ» قورعانىسىن بۇزىپ وتە العان جوق. تەك 39-مينۋتتا «دينامو» ساپىنان پاۆەل چەرنوۆ ەسەپ ايىرماسىن قىسقارتۋعا مۇمكىندىك الدى.

ءۇشىنشى كەزەڭنىڭ 59-مينۋتىندا ايدىن يەلەرى تاعى ءبىر شايبا سوعىپ كەتتى. ونى ريگالىق حوككەيشى دەنيس پارشين ءوزىنىڭ ەنشىسىنە جازدى. كەزدەسۋدە «بارىس» 3:2 ەسەبىمەن باسىم ءتۇسىپ، جاڭا ماۋسىمداعى العاشقى جەڭىسىن تويلادى. ەكى كوماندا بۇگىنگە دەيىن 23 مارتە كەزدەسكەن. ونىڭ 15 ءى «بارىستىڭ» باسىمدىعىمەن اياقتالسا، قالعانىندا لاتۆيالىق كلۋب باسىم ءتۇستى. ايتا كەتەرلىگى، سوڭعى ەكى كەزدەسۋدە «دينامونىڭ» مەرەيى ۇستەم بولدى. ەندى «بارىس» 5-قىركۇيەكتە بەلارۋستىڭ «دينامو» (مينسك) ، 7 -قىركۇيەكتە رەسەيدىڭ تسسكا (ماسكەۋ) كوماندالارىمەن شەبەرلىك بايقاسادى. ال 10- قىركۇيەكتە «بارىس» ەلوردادا قىتايدىڭ «كۋنلۋن رەدستار» كومانداسىن قابىلدايدى.