سەنات سپيكەرىنىڭ جاڭا ورىنباسارى سايلاندى
«ق ر پرەزيدەنتىنىڭ جارلىعىمەن نۇرلان ءماجيت ۇلى ءابدىروۆ ق ر پارلامەنتى سەناتىنىڭ دەپۋتاتى بولىپ تاعايىندالدى. كونستيتۋتسيانىڭ 58-بابىنا سايكەس، سەنات ءتوراعاسىنىڭ ورىنباسارى لاۋازىمىنا سەناتور نۇرلان ءابدىروۆتى ۇسىنامىن. وزدەرىڭىزگە بەلگىلى، نۇرلان ءماجيت ۇلى - تاجىريبەلى جانە بىلىكتى مامان. ادىلەت مينيسترلىگىندە جانە قاۋىپسىزدىك كەڭەسىندە جاۋاپتى قىزمەتتەر اتقاردى. بۇگىنگە دەيىن ءماجىلىستىڭ زاڭناما جانە سوت- قۇقىقتىق رەفورما كوميتەتىنىڭ ءتوراعاسى رەتىندە تابىستى ەڭبەك ەتىپ كەلدى»، - دەدى ق ر پارلامەنتى سەناتىنىڭ ءتوراعاسى ماۋلەن اشىمبايەۆ سەنات وتىرىسىندا.
ءوز كەزەگىندە سەناتورلار داۋىس بەرۋ ارقىلى ءبىر اۋىزدان نۇرلان ءابدىروۆتىڭ كانديداتۋراسىن قولدادى.
«قاۋلى قابىلداندى. نۇرلان ءابدىروۆ قر پارلامەنتى سەناتىنىڭ ءتوراعاسىنىڭ ورىنباسارى بولىپ سايلاندى»، - دەدى سەنات ءتوراعاسى.
ايتا كەتەيىك، بۇگىن ق ر پارلامەنتى سەناتىنىڭ التىنشى شاقىرىلىمى ءوز جۇمىسىن باستادى.
اۆتور: ءالي يبرايەۆ
